Qazaqstan temirjoldary astyq eksporttaýǵa daıyn ba
ASTANA. KAZINFORM – Qazaqstannyń astyq eksportyn ulǵaıtý úshin negizgi temirjol baǵyttarynyń ótkizý qabileti kúsheıip keledi. Qytaı baǵyty boıynsha táýligine 75 poıyz, Ózbekstan baǵytynda – 60 poıyz, al Reseı baǵyty boıynsha – 100 poıyz ótkizýge múmkindik bar. Bul týraly Kólik vıtse-mınıstri Jánibek Taıjanov Úkimette baıandady.
Spıkerdiń aıtýynsha, sońǵy jyldary temir joldardy damytý boıynsha úlken jumys júrgizildi.
– Qytaı baǵytynda Dostyq – Moıynty ekinshi joly salyndy. Altynkól stantsııasy jáne Altynkól – Jetigen ýchaskesi jańartyldy. Osynyń arqasynda Qytaı baǵytynda táýligine 75 poıyzǵa deıin ótkizýge múmkindik bar, – dedi vıtse-mıınstr.
Ózbekstan baǵytynda Saryaǵash jáne Oazıs stantsııalarynyń ótkizý qabileti arttyryldy. Darbaza – Maqtaaral temirjoly aıaqtalyp, Syrdarııa beketi ashylǵan soń táýligine 60 poıyz ótkizýge bolady.
– Reseılik áriptestermen tıisti kelissózder júrgizildi. Nátıjesinde táýligine 100 poıyz ótkizýge múmkindik bar. Osylaısha, negizgi eksporttyq baǵyttarda astyq tasymalyn odan ári arttyrýǵa jaǵdaılar jasalǵan, – dedi Jánibek Taıjanov.
Tasymaldy turaqty baqylaý úshin Kólik mınıstrliginde jedel shtab jumys isteıdi. Mınıstrlik parkinde 16 900 astyq vagony, 17 800 jabyq vagon jáne 2 myńnan astam lokomotıv bar.
Buǵan deıin vıtse-mınıstr Qazaqstan astyǵyn qaı elder kóbirek satyp alatynyn aıtqan edi.
