Qazaqstan temirjol ónimderin Pákistan naryǵyna eksporttaıdy
ASTANA. KAZINFORM – Elde temirjol ınfraqurylymyna arnalǵan daıyn ónim eksporty ósip jatyr.
Otandyq kásiporyndar relstik bekitkishter men temirbeton shpaldaryn Ortalyq Azııa elderine jáne Reseıge jetkizýde. Qazir jańa naryqtarǵa shyǵý boıynsha kelissózder júrgizilip jatyr.
Bul jaıly Almatyda ótip jatqan Eksportshylar forýmynda belgili boldy. Forýmda shıkizatqa táýeldilikti azaıtyp, daıyn ónim eksportyn arttyrý máselesi kóterildi. Qazaqstan ekonomıkasyn ártaraptandyrý jáne shıkizatqa táýeldilikti azaıtý — Memleket basshysy Qasym-Jomart Toqaev qoıǵan negizgi mindetterdiń biri. Prezıdent óńdelgen, qosylǵan quny joǵary ónim eksportyn ulǵaıtýdy tapsyrǵan bolatyn.
«Bent» kompanııasynyń prezıdenti Dinmuhammed Kýzıevtiń aıtýynsha, relstik bekitkishterdiń tolyq jıyntyǵy búginde negizgi eksporttyq baǵytqa aınalǵan. Sondaı-aq olar jaqynda QazTrade kómegimen ónimderin Pákistan naryǵyna eksporttamaqshy.
— Biz Ortalyq Azııada relstik bekitkishterdiń tolyq jıyntyǵyn shyǵaratyn jalǵyz óndirýshimiz. Saýda jáne ıntegratsııa mınıstrligi men QazTrade qoldaýynyń arqasynda Qyrǵyzstan men Ózbekstanǵa turaqty jetkizilim jolǵa qoıyldy. Reseıge de eksport bastaldy. Ótken jyly Iran men Túrikmenstanǵa saýda-ekonomıkalyq mıssııamen bardyq. Qazir belsendi kelissózder júrip jatyr. 2025 jyly eksport kólemi shamamen 5 mln dollar boldy. 2026 jyly ony 8 mln dollarǵa jetkizýdi josparlap otyrmyz, — dedi ol.
QazTrade bas dırektory Aıtmuhammed Aldajarovtyń aıtýynsha, bul baǵyt Memleket basshysy qoıǵan ekonomıkany ártaraptandyrý mindetimen tikeleı baılanysty.
— Biz ár salanyń eksporttyq áleýetin, álemdik suranysyn jeke taldap otyramyz. Qazirgi kúni óńdelgen, básekege qabiletti ónimderdiń eksportyn arttyrýdy qolǵa aldyq, — dedi ol.
QazTrade ókilderi mundaı jobalar eldegi daıyn ónim eksportynyń jańa kezeńge ótkenin kórsetedi deıdi. Ortalyq kásiporyndarǵa saýda mıssııalarynan bastap, kelissóz júrgizýge, sheteldik naryqtarǵa shyǵýda júıeli qoldaý kórsetip keledi.
Aıta ketelik maıly daqyldardyń 90%-y elde óńdeletini týraly jazǵan edik.