«Qazaqstan temir joly» tarıftik saıasatyn ózgertedi
«Qazaqstan temir jolynyń» qyzmetterine bekitilgen tarıf baǵasy kórshiles elderden aıtarlyqtaı tómen. Bul týraly QR Kólik mınıstri Marat Qarabaev aıtyp berdi, dep habarlaıdy Kazinform tilshisi.
«Qazaqstan temir jolynyń qyzmetterine júrgiziletin tarıftik saıasat tıisti kólemdegi qarajatty tabýǵa múmkindik bermeıdi. Ulttyq operator qyzmetterine bekitilgen tarıftik baǵamdar kórshiles elder ishindegi eń tómengi bolyp otyr. Kóptegen júk túrleri óz baǵasynan tómen tarıftermen tasymaldanyp jatyr. Bıylǵy 10 aıda mundaı tasymaldar jalpy tasymaldyń 88% qurady», - dedi M. Qarabaev búgingi Úkimet otyrysynda.
Osyǵan baılanysty, temirjol ınfraqurylymyn damytýǵa baǵyttalǵan jobalardy ýaqytyly iske asyrý úshin el ekonomıkasynyń múddesin eskere otyryp, tarıftik saıasat ári qaraı jetildiriletin bolady.
«Bul rette eń aldymen shıkizattyq taýarlardy eksporttaýǵa arnalǵan tarıftik saıasatty jetildirýdi jón dep sanaımyz. Ol óz kezeginde kásiporyndardy shıkizatty el aýmaǵynda tereń óńdeýge yntalandyrady”, - dedi M. Qarabaev.
Buǵan deıin Marat Qarabaev shekaradaǵy temirjol ınfraqurylymynyń jaı-kúıi týraly aıtyp bergen edi.
