«Qazaqstan temir joly» men Pákistannyń ulttyq logıstıka korporatsııasy kelisim jasamaq
ISLAMABAD. KAZINFORM – Qasym-Jomart Toqaev Qazaqstan-Pákistan bıznes forýmynda Astana halyqaralyq qarjy ortalyǵy ınvestıtsııa, ınnovatsııa jáne korporatıvtik qyzmet kórsetý salalary boıynsha óńirdegi jetekshi ortalyq sanalatynyna toqtaldy, dep habarlaıdy Aqordanyń baspasóz qyzmeti.
– Búginde 100-ge jýyq elden 5 myńnan astam kompanııa osy platforma aıasynda tabysty jumys istep jatyr. Erekshe atap ótetin jaıt, ekojúıege Pákistannyń 11 kompanııasy qosylǵan. Qatysýshylar qatary aldaǵy ýaqytta da kóbeıedi dep senemiz. Qazaqstan, sondaı-aq óńir naryǵyna shyqqysy keletin pákistandyq kásipkerlerge senimdi ári ashyq múmkindikter usynamyz. Turaqty ınvestıtsııalyq qurylymdy udaıy jetildirip otyramyz, – dedi Prezıdent.
Memleket basshysynyń pikirinshe, Qazaqstan men Pákistannyń geografııalyq ornalasýy strategııalyq turǵydan mańyzdy. Eki el de óńirlik jáne jahandyq baılanystyń basty býyny bola alady.
– Eýrazııa júreginde ornalasqan Qazaqstan qurlyq arqyly saýda-sattyqta eleýli ról atqarady. Eýropa men Qytaı arasynda qurlyq joldarymen tasymaldanatyn júktiń 85 paıyzy biz arqyly ótedi. Qazirgi ýaqytta Transkaspıı halyqaralyq kólik baǵdaryn nemese Orta dálizdi damytý elimizdi transkontınentaldyq saýdanyń iri ortalyǵyna aınaldyratyn negizgi faktor retinde qarastyramyz. Sondaı-aq tranzıt aǵynyn anaǵurlym tıimdi úılestirýdi kózdeıtin Smart Cargo biryńǵaı tsıfrlyq basqarý platformasyn ázirledik. Bul rette «Qazaqstan temir joly» ulttyq operatory, «Qazposhta» aktsıonerlik qoǵamy men Pákistannyń ulttyq logıstıka korporatsııasy jáne Pakistan Post kompanııasy arasynda kelisimge qol qoıylýyn quptaımyn. Olardan mýltımodaldy kólik sheshimderin ilgeriletýge jáne elderimizdiń port ınfraqurylymyn birlese paıdalanýǵa jol ashatyn naqty qadamdar kútemiz, – dedi Qasym-Jomart Toqaev.
Osyǵan deıin Qasym-Jomart Toqaev pen Shahbaz Sharıftiń Qazaqstan-Pákistan bıznes forýmyna qatysqanyn jazdyq.
