«Qazaqstan temir joly» kompanııasynyń kásipkerge qatysty áreketteri zańsyz dep tanyldy

Pavlodar kólik prokýratýrasy 7 aı boıy zańdy jaýap ala almaǵan otandyq ınvestordyń quqyǵyn qorǵady, dep habarlaıdy Kazinform QR Bas kólik prokýratýrasynyń baspasóz qyzmetine silteme jasap.

Kásipker Ekibastuz qalasynda 2021-2025 jyldardy qamtıtyn kásipkerlikti damytý jónindegi Ulttyq ınvestıtsııalyq joba sheńberinde 2 mlrd teńgeden astam somaǵa aımaqta iri logıstıkalyq jáne qurylys ortalyqtaryn salýdy josparlaǵan. Kásipkerge jobalardy odan ári tolyqqandy damytý úshin kirme jol qajet bolǵan.

Alaıda «QTJ» UK» AQ jáne onyń fılıaldarynyń jeke laýazymdy tulǵalary ınvestorǵa onyń qurylysyna ruqsatty kelisýden bas tartqan. Al 2023 jyldyń qazanynda shaǵyn bızneske óz qarajaty esebinen ulttyq tasymaldaýshynyń qajettilikteri úshin qosymsha jańa temir jol tósemin salýdy talap etetin tehnıkalyq sharttardy bergen.

Aıta ketý kerek, osydan buryn «QTJ» UK» AQ uqsas jaǵdaıda osy óńirdegi 3 kásipkerge temirjoldarǵa janasý úshin tehnıkalyq sharttardyń qajettiligi joq ekenin túsindirgen. Barlyq jaǵdaıda berilgen jaýaptarǵa bir basshy qol qoıǵan.

Kólik prokýratýrasynyń aralasýynan keıin ǵana ulttyq kompanııanyń «oıdan shyǵarylǵan» ákimshilik kedergisi joıyldy, kásipker aldynda qoıylǵan talaptar keri qaıtaryldy.

Prokýratýra aktisi boıynsha «QTJ» UK» AQ basqarma basshylyǵymen tehnıkalyq sharttardy alý kezinde qosarlanǵan standarttarǵa jol bergen laýazymdy tulǵalardyń kinálilik dárejesi jáne jaýapkershilik túri qarastyrylýda.

«Magıstraldyq jeli operatorynyń mundaı zańsyz áreketteri qurylys materıaldarynyń qunyn arttyrýǵa yqpal etetinin atap ótemiz»,-delingen Bas kólik prokýratýrasynyń habarlamasynda.