«Qazaqstan temirjoly» UK» AQ qaıta qurylatyn bolady - A. Jumaǵalıev

ASTANA. 20 naýryz. QazAqparat - «Qazaqstan temir joly» Ulttyq kompanııasy» aktsıonerlik qoǵamyn qaıta qurý arqyly temirjol salasynyń jańa modelin qurý usynylady. Bul týraly búgin Parlament Májilisiniń jalpy otyrysynda Kólik jáne kommýnıkatsııa mınıstri Asqar Jumaǵalıev málim etti.

Mınıstrdiń aıtýynsha, qaıta qurý sharasynyń negizinde ınfraqurylymdyq operator qurylyp, tasymaldaý qyzmeti bólinedi. Bul júkterdi tasymaldaý naryǵynda básekelestikti damytýǵa jaǵdaı jasaıdy. Sonymen qatar mınıstrdiń sózine sáıkes, vokzaldar men poıyzdardaǵy qyzmet kórsetý sapasyn arttyrý maqsatynda vokzal qyzmetteri men jolaýshylar tasymalynyń standarttaryn engizý, júk tasymaldaýyn lıtsenzııalaý, qyzmetterdiń múgedekter úshin qoljetimdi bolýyn qamtamasyz etý qarastyrylady. «Munyń syrtynda bıletterdi satý tártibi zań júzinde bekitilip, olardy satýdyń balama tásilderi kózdeledi»,-dedi mınıstr A. Jumaǵalıev.

Esterińizge sala keteıik, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.