Qazaqstan temirjoly búginnen bastap elimizdiń birqatar baǵyttaryna jańa jolaýshylar poıyzdary men elektr poıyzdaryn shyǵardy
ASTANA. Naýryzdyń 19-y. QazAqparat - «Qazaqstan temir joly» AQ búginnen bastap elimizdiń birqatar baǵyttaryna óte jaıly jańa jolaýshylar poıyzdary men elektr poıyzdaryn iske qosty.
Bul aqparatty atalǵan mekemeniń baspasóz qyzmeti taratyp otyr.
«Turǵyndardyń jolaýshylar tasymalyna degen talabyn oryndaý maqsatynda «QTJ» AQ ústimizdegi jyly naýryzdyń 19-ynan bastap óte jaıly (1,2,3 synypty), aptasyna eki ret (juma, jeksenbi) qatynaıtyn Astana-Pavlodar baǵytyndaǵy №802/801 jańa elektr poıyzyn engizdi. Atalǵan poıyzdyń iske qosylýynyń arqasynda Astanadan Pavlodarǵa deıingi júretin ýaqyt eki jarym saǵatqa qysqardy», delingen habarlamada.
Baspasóz qyzmetiniń taratqan aqparatyna sáıkes, qala mańyna qatynaıtyn №805/806 Astana-Kókshetaý jáne №807/808 Astana-Býrabaı kýrorty poıyzyn óte jaıly jańa elektr poıyzy almastyrǵan. Jańa quram jumsaq ta yńǵaıly oryndyqtarmen, jınalmaly ústeldermen jáne qaýipsizdik júıelerimen jabdyqtalǵan. 1 jáne 2 synypty vagondarda teledıdar qoıylǵan, vagon-bar tirkelgen. Al mashınıstiń kabınasynda táýlik boıǵy beınebaqylaý qondyrǵysy, sonymen birge avtomattandyrylǵan basqarý júıesi ornatylǵan. Elektr poıyzdyń syıymdylyǵy 650 jolaýshy. Al elektr poıyzdyń bosaǵan quramy «Qaraǵandy - Almaty» baǵytynda qatynaıtyn bolady.
Sondaı-aq búginnen bastap Astana stansysynan aptasyna eki ret Almatyǵa qatynaıtyn №36/35 jolaýshylar poıyzy júredi.
Jolaýshylardyń kúndelikti tasymalyn qamtamasyz etý maqsatynda Aqtóbe stansysynan Almaty-2 baǵytyndaǵy №34/33 jolaýshylar poıyzynyń tórtinshi quramy qosymsha engiziledi. Buǵan deıin bul poıyz aptasyna tórt ret qatynaıtyn bolatyn. Jolaýshylar vagondarynyń barlyǵy da óte jaılylyǵymen erekshelenedi. Quramada vagon-meıramhana, júk vagony bar. Joǵaryda atalǵan quramalardyń ashylýy «Naýryz» merekesine arnalǵan.
