Qazaqstan temirjolshylary Túrki memleketteri spartakıadasynda jeńiske jetti

TAShKENT. QazAqparat - Ózbekstan astanasynda Túrki memleketteri uıymy (TMU) sammıtine qatysýshy elder temirjol ákimshilikteriniń qyzmetkerleri arasynda I Halyqaralyq spartakıada ótti. QazAqparat bul týraly «Qazaqstan temir joly» ÚK» AQ-ǵa silteme jasap habarlaıdy.

Qazaqstan, Ózbekstan, Ázerbaıjan jáne Qyrǵyzstan temirjolshylarynyń komandalary ústel tennısi, shahmat, armrestlıng, gir sporty jáne arqan tartý sııaqty sport túrlerinen óner kórsetti.

Mundaı jarystar temirjolshylar arasynda alǵash ret ótkizilip otyr. Nátıjesinde QTJ komandasy jalpy komandalyq esepte jeńiske jetti. Qorjynda – 6 altyn, 3 kúmis jáne 1 qola medal. Qazaqstandyq temirjolshylarǵa armrestlıng, gir sporty, shahmat jáne arqan tartysta teń keler qarsylas bolmady.

Uıymdastyrýshylar spartakıada kezinde elder arasyndaǵy dostyq qarym-qatynastyń odan da berik negizderi qalanǵanyn atap ótip, qatysýshylarǵa kórsetken belsendiligi úshin rızashylyq bildirdi.

Sporttyq daǵdylardan basqa QTJ qyzmetkerleri keremet shyǵarmashylyq talanttaryn pash etti. Magıstral mamandary eldiń joǵary mádenı murasyn kórsetetin merekelik baǵdarlama uıymdastyrdy.