Qazaqstan temirjol ınfraqurylymynyń sapasy jóninen 110 eldi artta qaldyrdy
Bul jaıynda búgin Astana ekonomıkalyq forýmy aıasynda ótken IV Halyqaralyq kóliktik-logıstıkalyq «New Silk Way» bıznes forýmynda QR Premer-Mınıstriniń birinshi orynbasary Asqar Mamın málim etti, dep habarlaıdy QazAqparat.
«Qazaqstan Eýrazııalyq kólik júıesiniń kóliktik jelisine yqpaldasý jumystaryn qarqyndy júrgizýde jáne onyń damýyna aıtarlyqtaı úles qosyp otyr. Sońǵy 9 jylda Qazaqstandaǵy ınfraqurylymdardy, kólik pen logıstıkany damytýǵa salynǵan jalpy ınvestıtsııanyń kólemi shamamen 26 mlrd. dollardy qurady. Memleket basshysynyń «Nurly jol» baǵdarlamasyn «Jibek joly» ekonomıkalyq beldeýimen túıindestirý bastamasy ınvestıtsııa tartýǵa ján Qazaqstan men Qytaıdyń ınfraqurylymdyq jobalary boıynsha is-sharalardy úılestirýge múmkindik berdi. Búgingi kúnniń ózinde biz elderimizdiń shekarasynda 50 mln. tonnadan astam júkti ótkizýge qabiletti temir jol logıstıkalyq ınfraqurylymyn qurdyq. Sońǵy jyldary shamamen 2,5 myń shaqyrym jańa temirjol salyndy», - dedi birinshi vıtse-premer.
Onyń aıtýynsha, Búkilálemdik ekonomıkalyq forýmnyń málimetterine sáıkes, Qazaqstan temirjol ınfraqurylymynyń sapasy boıynsha 2016 jyldyń qorytyndysynda 136 eldiń ishinde 26-orynǵa turaqtady. Al logıstıkalyq quzirettilik ındeksi boıynsha Qazaqstan 77-orynda tur.
«Biraq biz 2020 jylǵa qaraı úzdik 40 eldiń qataryna qosylý maqsatyn alǵa qoıyp otyrmyz», - dedi Asqar Mamın.
