«Qazaqstan temir jolynyń» qyzmetkerlerin áleýmettik qoldaýdyń 2010 jylǵy bıýdjeti 3 mlrd. 420 mln. teńgeden astam boldy
ASTANA. Shildeniń 29-y. QazAqparat /Janna Qorqytova/ - «Qazaqstan temir jolynyń» qyzmetkerlerin áleýmettik qoldaýdyń 2010 jylǵy bıýdjeti 3 mıllıard 420 mıllıonnan astam teńgeni qurady, dep habarlady kompanııanyń baspasóz qyzmetinen. Bul málimetter birinshi jartyjyldyqty qorytyndylaýǵa arnalǵan keńeste jarııa etildi.
Kompanııa eńbekkerlerin áleýmettik qoldaýǵa qarastyrylǵan shyǵystyń jalpy somasy 2010 jyly 3 420,712 mıllıon teńgeni qurap otyr, al byltyrǵy kórsetkish - 3 393,0 mıllıon teńgeni shamalaǵan bolatyn.
Aǵymdaǵy jyldyń basynan beri salada turǵyn úı baǵdarlamasyn júzege asyrý bastaldy. Maýsym aıynda kompanııa prezıdenti Qytaımen shekaralas Dostyq stansysynyń turǵyndaryna 216 páterdiń kiltin tabys etti.
Búgingi tańda sondaı-aq, Almaty oblysyndaǵy sel tasqynynan zardap shekken 20 úıdiń qurylysy men 23 úıdiń kúrdeli jóndeý jumystary aıaqtalyp keledi. Tabıǵı apat saldarynan zardap shekken temirjolshylar 2010 jylǵy tamyzdyń 5-ine deıin qonys toılaryn toılamaq.
Sonymen birge qazir Astana ákimdigimen birlese otyryp, sala eńbekkerlerine jalǵa beriletin 20 páter berýdiń jaıy sheshilýde.
Áleýmettik qoldaý sharalary oń nátıje berip te jatyr: aǵymdaǵy jyldyń birinshi jartyjyldyǵynda temirjolshylardyń eńbek ónimdiligi, byltyrǵy kezeńmen salystyrǵanda, 12 paıyzǵa ósip otyr.
