«Qazaqstan temir jolyn» tolyqqandy kólik-logıstıka kompanııasy etip qaıta qurý jumysyn aıaqtaý qajet - Prezıdent

ASTANA. QazAqparat – Astana, Almaty, Shymkent jáne Aqtóbe áýejaılary mýltımodaldy ortalyq bolýy tıis. Bul týraly búgin Qazaqstan halqyna Joldaýyn jarııalaý kezinde Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Bizge teńiz ınfraqurylymyn damytýǵa arnalǵan birtutas jospar kerek. Onda Quryq portyna aıryqsha mán berilýge tıis. Quryqty Aqtaý porty sııaqty tolyqqandy logıstıkalyq klasterge aınaldyrýymyz qajet. «Soltústik-Ońtústik» halyqaralyq dálizi de óte mańyzdy. Sol arqyly Parsy shyǵanaǵyna shyǵýǵa bolady. Birtindep bul baǵyttaǵy temirjol jelisiniń ótkizý múmkindigin eki ese arttyrý kerek. Aldymen, «Bolashaq-Chelıabınsk» temirjol jelisiniń Qazaqstandaǵy bóligin jańǵyrtýǵa kirisý qajet», - dedi Qasym-Jomart Toqaev.

Prezıdenttiń aıtýynsha, halyqaralyq dálizdermen tıimdi baılanys ornatý úshin logıstıka qyzmetin tolyq usyný mańyzdy. Astana, Almaty, Shymkent jáne Aqtóbe áýejaılary mýltımodaldy ortalyq bolýy tıis. Bul ortalyqtar básekege qabiletti bolý úshin júkterdi qabyldaý jáne taratý qyzmeti sapaly atqarylýy kerek. Jalpy, salany damytý úshin tarıf jáne retteý saıasaty durys júrgizilýge tıis. Jeke ınvestıtsııany kóptep tartý kerek.

«Qazaqstan temir jolyn» tolyqqandy kólik-logıstıka kompanııasy etip qaıta qurý jumysyn jýyq arada aıaqtaý qajet», - dedi Memleket basshysy.