Qazaqstan temir joly jumysyna ózgerister kerek - senator
Depýtat Premer-Mınıstr Álıhan Smaılovtyń atyna joldaǵan depýtattyq saýalynda elimizdegi temirjoldyń problemalary týraly aıtyp, olardy sheshý joldaryn usyndy, dep habarlaıdy QazAqparat tilshisi.
Senatordyń aıtýynsha, búgingi tańda «Jolaýshylar tasymaly» AQ jyljymaly quram parkinde 2 228 vagon bar, olardyń 35 paıyzynyń paıdalanýǵa berilgenine 28 jyldan asyp ketken. Talgo vagondaryn eseptemegende, jolaýshylar vagondary ortasha eseppen 63%-ǵa, al lokomotıvter 67%-ǵa tozǵan.
B. Qanıev óziniń depýtattyq saýalynda ishki júk tasymalynyń qymbattyǵy máselesin de kóterdi. Ol taýarlardyń túpki qunyn arttyrýǵa yqpal etedi. Atap aıtqanda, «QTJ» AQ menshiginde júkti tıeý-túsirýge arnalǵan 170 arnaıy oryn bar, al olardyń jeke menshiktegi sany 3 600-den asady.
Senatordyń pikirinshe, ol jerdegi tarıfterdiń baqylaýsyzdyǵy men alypsatarlyq áreketter temirjol júkteri baǵasynyń aıtarlyqtaı qymbattaýyna ákelip otyr.
«Temirjol tasymalynyń áleýmettik-ekonomıkalyq mańyzy men tranzıttik áleýetin eskere kelgende, «Qazaqstan temir joly» AQ túbegeıli reformalardy qajet etedi. Osy máselelerdi sheshýdi, eń aldymen, salanyń tájirıbeli mamandaryn basshylyq laýazymdarǵa taǵaıyndaýdan bastaǵan jón dep sanaımyz. Elimizde memlekettik aktıvterdi jekeshelendirý saldarynan bolǵan jaǵymsyz jaǵdaılardy eskere otyryp, jekeshelendirilgen júk tıeý oryndaryn, bagaj bólimshelerin «Qazaqstan temir joly» AQ menshigine qaıtarý qajet», - dedi depýtat.
