«Qazaqstan temir joly» jolaýshylar jáne júk aǵymynyń ósimin 15 paıyzǵa arttyrmaq

ASTANA. 21 qańtar. QazAqparat - «Qazaqstan temir joly» bıyl jolaýshylar jáne júk aǵymynyń ósimin 15 paıyzǵa arttyrmaq. Bul týraly búgin QR Úkimet basshysy Serik Ahmetovtiń qatysýymen ótken «Qazaqstan temir joly» UK» AQ-nyń alqa májilisinde kompanııa basshysy Asqar Mamın aıtty.

«2014 jyly 2013 jylmen salystyrǵanda jolaýshylar jáne júk aǵymynyń ósimin 15 paıyzǵa qamtamasyz etý josparlanýda. Sondaı-aq «QTJ» AQ-nyń aǵymdaǵy jylǵy tabysy 962 mlrd. teńge, al taza kirisi 122 mlrd. teńgeden tómen bolmaıtyndyǵy mejelenýde», - dedi ol.

Sondaı-aq kompanııa basshysynyń atap ótýinshe, elimizdiń kólik-logıstıkalyq júıesin damytý jónindegi keshendi is-sharalardy júzege asyrý 2020 jylǵa qaraı tranzıttik tasymal kólemin 18-den 36 mln. tonnaǵa deıin arttyrýǵa múmkindik beredi. Al bul oraıda jańadan ashylatyn jumys oryndarynyń sany 28 myń birlikti quraıtyn bolady.

«Ekonomıkalyq zertteýler ınstıtýtynyń baǵalaýyna sáıkes kólik-logıstıkalyq keshenniń qyzmetinen keletin ortasha tıimdilik jalpy ishki ónim ósimi qarqynyna qosymsha 1 paıyz qosady», - dedi A.Mamın.