«Qazaqstan temir joly» UK-nyń basqarma quramy ózgerdi
ASTANA. QazAqparat - «Qazaqstan temir joly» UK» AQ basqarmasynyń quramy ózgerdi. Bul jaıynda QazAqparat Qazaqstannyń qor bırjasyna silteme jasap habarlaıdy.
Osy máselege baılanysty taratylǵan aqparatqa sáıkes, Arman Sultanov kompanııanyń damý jónindegi vıtse-prezıdenti qyzmetine taǵaıyndaldy. Mundaı sheshim 9 aqpanda qabyldanǵan bolatyn. Sondaı-aq operatsııalyq qyzmetterdi úılestirý jónindegi vıtse-prezıdent mindetin atqarý Sanjar Elýbaevqa júkteldi.
«Qazaqstan temir joly» respýblıkalyq memlekettik kásiporny Qazaqstan Respýblıkasy Úkimetiniń 1997 jyly 31-qańtardaǵy №129-shy qaýlysy negizinde quryldy.
«Qazaqstan Respýblıkasynyń temir jol kásiporyndaryn qaıta qurý týraly» dep atalatyn bul qaýly negizinde Almaty temirjol basqarmasy, Tyń temir joly men Batys Qazaqstan temirjol basqarmasy syndy memlekettik kásiporyndar biriktirildi. Ondaǵy maqsat - tasymaldaý protsesin basqarý jáne qajetsiz býyndardy taratý, temir jol salasyn qarjylyq-ekonomıkalyq turǵydan saýyqtyrý bolatyn.
Qazaqstan Respýblıkasy Úkimetiniń 2002 jyly 15-naýryzdaǵy «Qazaqstan temir joly» ulttyq kompanııasy» jabyq aktsıonerlik qoǵamyn qurý týraly» №310-shy qaýlysy negizinde «Qazaqstan temir joly» RMK men onyń enshiles kásiporyndary biriktirilip, «QTJ» UQ» JAQ quryldy.
2004 jyldyń 2-sáýirinde Qazaqstan Respýblıkasynyń 2003 jyly 13-mamyrdaǵy «Aktsıonerlik qoǵamdar» týraly zańyna sáıkes «QTJ» UK» JAQ «QTJ» UK» AQ bolyp qaıta tirkeldi.
Qazirgi tańda «QTJ» UK» AQ qyzmettik tutastyq pen temirjol salasyn tıimdi basqarýǵa negizdelgen holdıng bolyp tabylady. «QTJ» UK» AQ-nyń dara aktsıoneri «Samuryq-Qazyna» ulttyq ál-aýqat qory» AQ.
