«Qazaqstan temir joly» UK» AQ 2009 jylǵy óndiristik-sharýashylyq kórsetkishter boıynsha jeńimpazdy anyqtady
ASTANA. Naýryzdyń 30-y. QazAqparat - «Qazaqstan temir joly» UK» AQ 2009 jylǵy óndiristik-sharýashylyq kórsetkishter boıynsha 14 jol bólimsheleri arasynda jeńimpazdy anyqtady,
dep habarlady atalǵan vedomstvonyń baspasóz qyzmetinen.
Baspasóz qyzmetiniń habarlaýynsha, Oral jol bólimshesi «Salalyq jarystyń jeńimpazy» ataǵyna ıe bolyp, mekeme basshysy Dáýletbaı Esimbekov «Úzdik basshy» belgisimen marapattalǵan.
«Oral jol bólimshesi - respýblıka boıynsha asa jaýapty magıstraldik jelilerdiń biri. Óıtkeni, ol Reseı temirjolymen eki telimde túıisedi. Oraldyq temirjolshylar tranzıttik júkter men halyqaralyq jolaýshylar tasymalyn ýaqytynda, irkilissiz atqaryp otyrýy tıis. Bul aýmaqta negizinen munaı, gaz, astyq túrleri kóp tıeledi. Ótken jyly jaıyqtyqtar ózderine berilgen tapsyrmany tyńǵylyqty oryndady», delingen habarlamada.
2009 jyly oraldyq temirjolshylar 17 óndiristik-sharýashylyq kórsetkishteriniń 14-in tyńǵylyqty oryndady. Onyń ishinde asa mańyzdy júk aınalymy, vagondy tıimdi paıdalaný, ýchaskelik jáne tehnıkalyq jyldamdyq, poıyzdyń ortasha salmaǵy, lokomotıv tartymy jóninde jaqsy kórsetkishterge qol jetkizdi. Sonymen qatar bólimshede jyl boıy óndiristik aqaýlarǵa jol berilgen joq. Eńbekti qorǵaý jáne qaýipsizdik sharalaryn qamtamasyz etý joǵary deńgeıde atqaryldy. Aǵymdaǵy jyly da oraldyq temirjolshylar aldaryna joǵary mindetter qoıyp, ony oryndaýǵa kirisip ketti.
«Oraldyq temirjolshylar bul tabystaryn Qazaqstandaǵy tuńǵysh temir jol qarlyǵashy Pokrovskaıa Sloboda - Oral temir jol ýchaskesiniń 115 jyldyǵyna arnap otyr. Osylaısha, jaıyqtyqtar el temirjolshylary ishindegi jetekshilik oryndy saqtap qaldy», dep naqtylaı túsken baspasóz qyzmeti.
