«Qazaqstan temir joly» «senim» telefonyn iske qosty

ASTANA. QazAqparat - «Qazaqstan temir joly» Ulttyq kompanııasy» aktsıonerlik qoǵamy «senim» telefonyn iske qosty. Jolaýshylar endi osy nómir arqyly qozǵalys qaýipsizdigine baılanysty ózderin alańdatqan máselelerdi habarlaı alady. Bul týraly kompanııanyń baspasóz qyzmeti málim etti. 

«Qazaqstan temir joly» UK» AQ qozǵalys qaýipsizdigin buzý týraly málimetterdi [phone] nómiri boıynsha qabyldaıdy. Atalǵan telefonǵa endi temirjol kóliginde bolǵan qaýipsizidikpen baılanysty málimetterdi habarlaýǵa bolady»,- delingen kompanııa taratqan málimetterde.

Ulttyq kompanııanyń Qozǵalys qaýipsizdigi departamentiniń menedjeri Nııazbek Jańabaevtyń aıtýynsha, «senim» telefonyna joldanatyn habarlamalardyń qupııalylyǵyna jáne anonımdigine kepildik beriledi.

«Abonent baılanysqa kez kelgen laqap atpen shyǵýyna nemese tipti esimin aıtpaýyna da bolady. Bul rette abonent nómiri tirkelmeıtindikten, onyń qaýipsizdigi qamtamasyz etiledi. Aradaǵy áńgime úshinshi tarapqa berilmeıdi. Budan basqa, abonenttiń pikiri men kózqarasy talqyǵa salynbaıdy jáne synǵa alynbaıdy. Bul óz kezeginde problemany ashý úshin tıimdi jumys júrgizý jáne jan-jaqty erkin sóılesý úshin qolaıly jaǵdaılar týǵyzady», - deıdi N.Jańabaev.

Mamannyń aıtýynsha, habarlamada aıtylǵan faktiler rastalatyn bolsa olar boıynsha jedel túrde tıisti sharalar qoldanylady.

Osyǵan deıin «QTJ» UK» AQ-nyń temir joldaǵy qozǵalys qaýipsizdigi júıesin qaıta qarastyrǵandyǵyn jazdyq.