«Qazaqstan temir joly» ókilderi esep komıteti anyqtaǵan sáıkessizdikterdi túsindirdi
ASTANA. QazAqparat - «Qazaqstan temir joly» UK» aktsıonerlik qoǵamynyń jobalarynan aýdıtorlar anyqtaǵan sáıkessizdikter protsedýralyq sharalarmen baılanysty jáne olar tekserý jumystary barysynda joıyldy, dep habarlady QazAqparat tilshisine ulttyq kompanııa ókilderi.
Ulttyq kompanııa ókilderiniń málimetterinshe, esep komıteti «Almaty-Shý» baǵytynyń ekinshi joldaryn, Quryq aılaǵynda parom keshenin salý men ámbebap jolaýshylar-júk paromdaryn paıdalaný, «Borjaqty - Ersaı» jelisiniń temir joly men «Qorǵas-Shyǵys qaqpasy» erkin ekonomıkalyq aımaǵyn qurý men ony keshendi damytý sııaqty jobalardy júzege asyrý úshin «Samuryq-Qazyna» ÁAQ» AQ-nyń jarǵylyq kapıtalyn tolyqtyrýǵa bólingen respýblıkalyq bıýdjettiń oryndalýyna tekserý júrgizdi.
«Tekserý jumystarynyń nátıjesi boıynsha, atalǵan jobalar protsedýralyq sáıkessizdik retinde baǵalandy jáne aýdıt barysynda joıyldy. Sondaı-aq eshqandaı materıaldyq shyǵyndar ákelgen joq»,-delingen ulttyq kompanııanyń habarlamasynda.
Atalǵan ınvestıtsııalyq jobalar belgilengen josparǵa saı júzege asyryldy jáne olar tıimdi ekonomıkalyq serpni berip otyr.
Sondaı-aq 2016 jyldyń qorytyndysy boıynsha, «Qorǵas-Shyǵys qaqpasy» erkin ekonomıkalyq aımaq qurǵaq porty boıynsha 87 konteıner qabyldaýdan ótken. 2017 jyly 364 myń konteıner qabyldaý josparlanyp otyr.
«Qorǵas-Shyǵys qaqpasy» erkin ekonomıkalyq aımaǵynan basqa quny 15,6 mlrd teńge bolatyn 100 paıyz jeke ıeliktegi kapıtaldyń qatysýymen 5 joba júzege asyrylýda jáne bıylǵy jyldyń sońyna deıin 160 mlrd teńge kóleminde ınvestıtsııa tartý josparlanyp otyr.
