Qazaqstan temir joly naýryzdyń 19-ynan bastap jańa jolaýshylar jáne qalaaralyq poıyzdardy jolǵa shyǵarady
ASTANA. Naýryzdyń 12-si. QazAqparat /Marlan Jıembaı/ - «Qazaqstan temir joly» ulttyq kompanııasy» AQ naýryzdyń 19-ynan bastap jańa jolaýshylar jáne qalaaralyq poıyzdardyń jolǵa shyǵatyndyǵy týraly aqparat taratyp otyr.
Atalǵan kompanııanyń baspasóz qyzmetiniń taratqan aqparatyna sáıkes, Astana men Almaty qalalarynyń arasynda úsh kúnde bir ret 15 vagonnan turatyn №36/35 jolaýshylar poıyzynyń bir quramy qatynaıtyn bolady. Poıyz Astanadan Almatyǵa 17 saǵat 20 mınýtta, al Almatydan Astanaǵa 18 saǵat 01 mınýtta júredi. Eki aralyqty júrý ýaqyty - 19 saǵat 01 mınýt jáne sáıkesinshe 20 saǵat 44 mınýt.
Sondaı-aq aptasyna eki márte (juma, jeksenbi kúnderi) Astana men Pavlodar qalalarynyń arasyna 8 vagonnan turatyn №801/802 poıyzy qatynaıdy. Jolaýshylar kóligi Astanadan Pavlodarǵa 17 saǵat 30 mınýtta, al Pavlodardan Astanaǵa 8 saǵat 45 mınýtta attanady. Sondaı-aq olardyń da eki aralyqty júrip ótý ýaqyttary sáıkesinshe 6 saǵat 29 mınýt jáne 6 saǵat 15 mınýtqa teń.
Al Aqtóbe men Almaty-2 arasyna qatynaıtyn №34/33 jolaýshylar poıyzyna qosymsha 4-shi qurama engizilip, ol kún saıyn (buǵan deıin aptasyna 4 ret) qatynaıdy.
Atalǵan jolaýshylar poıyzyna bıletti naýryzdyń 12-sinen bastap temirjol kassalarynan alýǵa bolady.
