Qazaqstan temir joly men Jetisý oblysynyń ákimdigi yntymaqtastyq týraly memorandýmǵa qol qoıdy
Dostyq-Moıynty ýchaskesinde ekinshi jol salýdyń ınfraqurylymdyq jobasy «Kúshti óńirler – eldi damytýdyń draıveri» Ulttyq jobasy sheńberinde iske asyrylady. Elimizdiń tranzıttik áleýetin jáne ýchaskelerdiń ótkizý qabiletin arttyrýdan basqa, joba óńirdiń damýyna mýltıplıkatıvtik áser etedi. Temir jol salý kezinde otandyq óndirýshiler materıaldaryn paıdalaný jáne jergilikti mamandardy tartý josparlanyp otyr. Jumys barysynda jáne ekinshi joldy paıdalanýǵa bergennen keıin Jetisý oblysy aýmaǵynda 2 000-ǵa jýyq jumys orny qurylady.
Keńeste Alakólge deıin jolaýshylar tasymalyn uıymdastyrý máseleleri qaraldy. Osy maýsymda 11 jolaýshylar poıyzy júrse, onyń 9-y «Jolaýshylar tasymaly» AQ, al 2-ýi jeke tasymaldaýshyǵa tıesili boldy. Ulttyq tasymaldaýshy QR IIDM qoldaýymen Almatydan eki baǵyt boıynsha «Talgo» vagondarynan qurylǵan jolaýshylar quramyn iske qosty. Jalańashkól, Kóktuma, Aqshı jáne Beskól stantsııalarynda vokzal ǵımarattary men jolaýshylar platformalary jóndeldi. Múmkindigi shekteýli azamattarǵa yńǵaıly bolý úshin vokzal ǵımarattarynda pandýstar, kútý zalynda arnaıy oryndar ornatylyp, múgedekter arbalary satyp alyndy.
Oblys turǵyndary men kásipkerleriniń suranystaryn oryndaýǵa erekshe nazar aýdaryldy. Dostyq jáne Taldyqorǵan stantsııalarynda temirjoldar arqyly jaıaý júrginshiler ótkelderin salý, Tekeli energokeshenine vagondardyń úzdiksiz berilýin qamtamasyz etý jáne temirjolshylardyń qajettilikteri úshin óz ónimderin jetkizýde oblys kásiporyndaryn qoldaý máselelerin sheshý týraly ýaǵdalastyqqa qol jetkizildi.
Oblys ákimi Beıbit Isabaev iskerlik, syndarly kezdesýdi uıymdastyrýǵa qatysqany úshin alǵysyn bildirip, Jetisý oblysynda QTJ ınfraqurylymdyq jobalaryn iske asyrýǵa tolyq kómek kórsetiletinine sendirdi.
Keńes qorytyndysy «QTJ» UK» AQ men Jetisý oblysy ákimdigi arasyndaǵy yntymaqtastyq týraly ekijaqty memorandýmǵa qol qoıýmen bekitildi.
