Qazaqstan temir joly men sıngapýrlyq kompanııa tsıfrlyq platforma ázirledi

ASTANA. QazAqparat - «Qazaqstan temir joly» UK» AQ men sıngapýrlyq PSA International Pte Ltd kompanııasy tsıfrlyq kólik dálizin qurý máselesin talqylady, dep habarlaıdy QazAqparat.

Bul másele «QTJ» basshylyǵy men Sıngapýr kompanııasynyń logıstıka salasyndaǵy strategııalyq yntymaqtastyq boıynsha ókilderimen kezdesýinde kóterilgen.

Taraptar Azııa-Eýropa tsıfrlyq saýda dálizin qurý taqyrybynda sóz qozǵady. Bul bastamany iske asyrý Memleket basshysynyń eldiń tranzıttik áleýetin arttyrý jáne jahandyq logıstıkalyq ekojúıedegi senimdi kólik haby retindegi Qazaqstannyń ımıdjin nyǵaıtý boıynsha qoıǵan mańyzdy mindetin sheshýge múmkindik beredi.

Kezdesýde PSA International Pte Ltd – Crimson Logic enshiles kompanııasy QTJ mamandarymen birlesip ázirlegen biryńǵaı tsıfrlyq platforma tanystyryldy. Jańa júıede Calista-AE jetkizý tizbegin basqarýda sıngapýrlyq onlaın-platformanyń QTJ aqparattyq júıelerimen ıntegratsııalaný múmkindikteri paıdalanylǵan.

Tsıfrlyq sheshimdi Transkaspıı halyqaralyq kólik baǵdarynda qoldaný josparlanýda. Platforma klıentter úshin sapaly jáne yńǵaıly servıs jasap, halyqaralyq tasymaldaýshylar úshin marshrýttyń tartymdylyǵyn arttyrady. Tsıfrlyq format memlekettik organdarmen jáne ekspedıtorlarmen ashyq ózara is-qımyldy qamtamasyz etedi. Tranzıttik júkterdi resimdeý kezinde qaǵaz qujat aınalymyn boldyrmaýdan basqa, júkterdi jetkizý merzimi qysqarady.

Aıta keteıik, PSA International Pte Ltd – 26 elde termınaldary bar álemdegi eń iri port operatorlarynyń biri.