«Qazaqstan temir joly» kóktemgi sý tasqynyna daıyndyq sharalaryn júrgizýde
ASTANA. QazAqparat - Temirjolshylar poıyzdardyń úzdiksiz jáne qaýipsiz qozǵalysyn qamtamasyz etý úshin kóktemgi sý tasqynyna belsendi daıyndalýda, dep habarlaıdy «Qazaqstan temir joly» UK» aktsıonerlik qoǵamynyń baspasóz qyzmeti.
Baspasóz málimetterine qaraǵanda, jergilikti atqarýshy organdar men tótenshe jaǵdaılar jónindegi basqarmalarmen birlesip temirjolshylar tasqyndy sý ótetin aımaqtardaǵy barlyq ınjenerlik qurylǵylardy muqııat qarap shyqty. Temirjol tósenishterine jaqyn ornalasqan sý qoımalary men plotınalar tekserilýde.
«Kólik quraldary, drezınalar, avtotraktorlyq tehnıka tolyqtaı daıyndyqqa keltirildi. Janar-jaǵarmaıynyń arnaıy qory quryldy. Sý ótkizý qubyrlaryn, kópirdiń tehnologııalyq tesikterin qoqystan, muzdan jáne qardan tazartý jumystary júrgizilýde. Bul rette 6 myńnan astam qurylystar arshyp alyndy»,-delingen habarlamada.
Qazirgi tańda kondıtsııaly emes temirbeton shpaldarymen, rels paketterimen, kesek tastarmen jabdyqtalǵan 30-ǵa tarta arnaıy poıyzdar quryldy. Qajetti jaǵdaıda jeli qyzmetiniń jumysshylary qysqa merzim ishinde joldardy qalpyna keltiredi jáne poıyzdardyń qaýipsiz ótýin qamtamasyz etedi.
Aǵymdaǵy jyldyń 1 sáýirinde 42 arnaıy poıyz jasaqtalady.
Sý tasqyny bola qalǵan jaǵdaıda jaýapty tulǵalardyń táýlik boıyna kezekshiligi, tekserister oryn bolady.
