«Qazaqstan temir joly» BQO-da zardap shekken temirjolshylarǵa kómektespek
ASTANA. 19 sáýir. QazAqparat /Gúlmıra Álıakparova/ - «Qazaqstan temir joly» UK» AQ Batys Qazaqstan oblysynda kóktemgi sý tasqynynan zardap shekken temirjolshylarǵa kómektesý úshin aýqymdy sharany bastaýǵa ázirlik ústinde.
18 sáýirdegi málimetter boıynsha, salada jumys isteıtin jáne olardyń otbasylary, barlyǵy 185 adam kómekke zárýlerdiń tiziminde tur. 67 otbasy nemese 200 adam, sonyń ishinde 57 bala kóktemgi sý tasqynynan zardap shekti. Olardyń arasynda vagonshylar, jol boıy qyzmetkerleri, baılanysshylar, kúzet qyzmeti, jolaýshylar sharýashylyǵynyń jumysshylary jáne basqalar bar», - delingen QTJ-nyń taratqan habarlamasynda.
Qazirgi ýaqytta QTJ, salalyq kásipodaq jáne «Nur Otan» partııasy bastaýysh partııalyq uıymy basshylarynyń jumysshylardyń zardap shekken múlkin qaıta qalpyna keltirý, járdemaqy tóleý jáne gýmanıtarlyq kómek kórsetý týraly birlesken sheshimi júzege asyrylý ústinde.
Onymen birge, temir jol salasynyń ujymy, sonyń ishinde ortalyq apparat, onyń fılıaldary men enshiles aktsıonerlik qoǵamdar áriptesterine bir kúndik jalaqylaryn aýdaratyn bolady. Aqsha qarajaty «QTJ» UK» AQ-nyń qaıyrymdylyq qory - «Áleýmettik jobalardyń korporatıvtik qoryna» túsip, keıin zardap shekkenderge bas-basyna úlestiriletin bolady.
