«Qazaqstan temir joly» 2020 jylǵa deıin 10 myń qyzmetkerin oqytpaq
ASTANA. 13 sáýir. QazAqparat - «Qazaqstan temir joly» UK» AQ-nyń 10 myńǵa jýyq qyzmetkeri 8 jyldyń ishinde qosymsha bilim alady, dep habarlady «QTJ» UK» AQ baspasóz qyzmetinen.
Bul - kompanııanyń 2020 jylǵa deıin qyzmetkerlerge bilim berý baǵdarlamasynyń maqsaty.
Byltyrǵy jyldardyń oqytý tájirıbesin eskere otyryp, 2012-2020 jyldarǵa arnalǵan jańa oqý baǵdarlamasynyń sheńberinde birneshe baǵytta jospar qurylǵan: álemniń jetekshi oqý oryndarynyń oqytýshylary men temirjol sarapshylaryn tarta otyryp, basshylarǵa modýldi bilim berý, shetelge magıstratýra baǵdarlamasy boıynsha oqýǵa jiberip, taǵylymdama, trenıngterge, tildik kýrstarǵa qatystyrý.
Modýldi bilim berý (ár pán kýrsy birneshe kúnge sozylady) ortalyq apparat pen aımaqtardaǵy 3 500 basshyny qamtıdy dep josparlanýda. 2012 jyly maýsym men qyrkúıek aılarynyń aralyǵynda kompanııa men onyń fılıaldarynyń basqarýshy qyzmetkerleri, onyń ishinde jol bólimsheleri men magıstraldyq jeli dırektorlary bilim alady. Qyrkúıekten qarasha aıyna deıin 50 qyzmetkerge shetelde trenıng pen taǵylymdamalar uıymdastyrylmaq.
Modýldi bilim berý Astanada jańa Oqý ortalyǵynyń ashylǵan soń júrgiziledi. Bilim berýdegi basym baǵyttar - strategııalyq menedjment, tıimdilikti basqarý, jobalyq menedjment, operatsııalyq menedjment, kóshbasshylyq, uıymdasqan damý, logıstıka, kóliktik qurylys jáne taǵy basqalary.
Sonymen qatar baǵdarlama aıasynda aımaqtardy qosa alǵanda kompanııa 5 myń qyzmetkerlerge aǵylshyn tili kýrstary qarastyrylǵan. 2012 jyly Astana, Almaty, Aqtóbe, Shymkent pen Qaraǵandy qalalaryndaǵy 260 temirjolshy aǵylshyn tili kýrstaryna qatysady.
Magıstratýrada bilim alý úshin konkýrstyq negizde granttar bólinedi.
