Qazaqstan temir joldarynda koronavırýsqa qarsy sharalar qabyldandy
Qytaıda koronavırýstyń taralýyna baılanysty «Qazaqstan temir joly» UK» AQ der kezinde aldyn alý sharalary qolǵa aldy.
Búgingi tańda Qazaqstan men Qytaı arasynda eki: №103/104 «Úrimji – Almaty-2» jáne №13-54/14-53 «Almaty-2 - Nur-Sultan Nurly jol – Úrimji» jolaýshylar poıyzy qatynaıdy.
«Elimizdiń aýmaǵynda vırýstyń taralýyna jol bermeý maqsatynda Dostyq jáne Altynkól stansalaryna kelgen poıyz jolaýshylary men brıgadalary qyzmetkerlerin qazaqstandyq sanıtarlyq qyzmeti tekseristen ótkizedi: olar teplovızor arqyly jol júrýshilerdiń jaǵdaıyn tekseredi jáne halin surap biledi. Sodan keıin jolaýshylar men poıyz brıgadasy qyzmetkerlerine shekaralyq jáne kedendik tekserister júrgiziledi», delingen habarlamada.
Ulttyq tasymaldaýshy jolserikterge udaıy nusqaýlyq ótkizip, aýyryp qalǵan jolaýshyny anyqtaý kezinde poıyz bastyǵynyń is-áreketin reglamenttedi, jolaýshylar nemese poıyz brıgadasy qyzmetkeriniń koronavırýspen aýyryp qalýy kúdigi týsa nemese anyqtalǵan kezinde jolaýshylar poıyzy bastyǵy úshin nusqaýlyq ázirlendi.
«Jolaýshylar poıyzynyń qozǵalysy kezinde jolaýshylar men qyzmet kórsetý personalynyń koronavırýspen aýyryp qalýy kúdiginde jolaýshylar poıyzynyń bastyǵy jedel túrde poıyz mashınısi arqyly medıtsınalyq pýnkt ornalasqan stansanyń kezekshisin nemese vokzal kezekshisin aqparattandyrýy kerek. Poıyzdyń toqtaý pýnktine kelýine deıin ol alǵashqy ınfektsııaǵa qarsy sharalardy (aýrýdy ózge jolaýshylardan bólekteý, aýrý jolaýshy ornalasqan vagon boıynsha adamdardyń qozǵalysyna tyıym salý, árbir 30 mınýt saıyn ydystardy, edendi, sanıtarlyq torapty jáne ózgelerine dezınfektsııa júrgizý) ótkizýge mindetti», delingen habarlamada.
Búgingi tańda, ýákiletti organmen kelisim boıynsha atalǵan poıyzdardyń ýaqytsha toqtatylýy jónindegi rásimder jasalýda.
QR Densaýlyq saqtaý mınıstrligi ókilderiniń qatysýymen Almaty jáne Nur – Sultan qalalarynda nusqaýlyqtar ótkizildi. Sondaı-aq poıyz brıgadalarynyń qyzmetkerleri betperdemen jabdyqtalǵan jáne olardy únemi taǵyp júrý týraly eskertilgen.
Budan basqa, Qazaqstan men Qytaı arasynda temirjol kóligimen bagaj ben qol júgin alyp júrýge baqylaý kúsheıtilgen.
Eske sala ketsek, buǵan deıin elordada ótken brıfıngte «QTJ - Júk tasymaly» AQ bas dırektory Qaırat Saýyrbaev «Qytaıda koronavırýs ınfektsııasynyń taralýy poıyzben júk tasymaldaýǵa esh áser etpeıtinin» málim etken edi.
