Qazaqstan temeki kontrabandasy saldarynan jyl saıyn 32 mlrd teńge joǵaltady

ASTANA. KAZINFORM – Búgin elordada «Antıkontrafakt» XII halyqaralyq forýmy aıasynda sarapshylar temeki ónimderiniń zańsyz aınalymy, onyń ekonomıka men halyqtyń densaýlyǵyna saldary, sondaı-aq problemany sheshý joldaryn talqylady.

Resmı derekterge súıensek, EAEO elderiniń kontrabandalyq temekini satýdan jyl saıynǵy salyq shyǵyny ósýde, shamamen 1,9 mlrd dollardy quraıdy. Eń kóp zardap shegetin Reseı, byltyr atalǵan eldiń ekonomıkalyq shyǵyny 130 mıllıard rýblge jetti. EAEO múshe elder ishinde Qazaqstanda ekinshi orynda, bıyl 32 mlrd teńgeni joǵaltty.

— Bizde temekige qatysty kontrafaktilik jaǵdaı kúrdeli. Jyl saıyn naryqta shamamen 3%-y zańsyz ónim aınalym júrip jatyr. Búginde kontrafaktilik ónimderdiń úlesi temekiniń jalpy sanynyń 10%-nan asady. Bul sala úshin de, bıýdjet úshin de úlken shyǵyn. Temeki qunynyń jartysynan astamyn aktsızder men qosylǵan qun salyǵy quraıdy, bıyldyń ózinde memleket 32 mlrd teńgeden artyq aqshadan qaǵylyp otyr, — dedi QazSpirits qaýymdastyǵynyń atqarýshy dırektory Dmıtrıı Jýkov.

Osy oraıda qaýymdastyq basshysy kontrafaktimen kúres sharalaryn usynyp otyr.

— Máseleni bir sharamen sheshý múmkin emes, keshendi tásil qajet. Ákimshilik quqyq buzýshylyq týraly kodekstiń jekelegen baptaryn qatańdatý qajet, múmkin kontrafaktilik saýdanyń jolyn kesýge baǵyttalǵan jańa baptardy engizý kerek. Eger zańsyz taýarlardyń partııasy az bolsa, quqyq buzýshy jaýapkershilikten qashqaqtaıdy, bul naryqta shaǵyn kólemdi zańsyz aınalymǵa serpin beredi. Sonymen qatar, kedendik baqylaýdy kúsheıtý qajet, búkil júkti tolyq qadaǵalaý ońaı sharýa emes, ásirese zańsyz taýarlardyń kóleńkeli aınalymǵa túsýin anyqtaý, — deıdi ol.

Onyń aıtýynsha, kontrafaktige qarsy kúreske bıznes ókilderi de belsendi qatysý qajet.

— Polıtsııa men fıskaldyq organdarda ár saýda núktesin baqylaýǵa jetkilikti resýrstar joq. Problemanyń aýqymyn azaıtý úshin bıznes belsendi qatysýy qajet, — dep tolyqtyrdy D. Jýkov.

Eske sala ketsek, Úkimet basshysy Oljas Bektenov kontrafaktilik ónimdermen kúres jumystaryn kúsheıtýdi tapsyrdy.