«Qazaqstan» teleradıokorporatsııasynyń basqarma tóraǵasy taǵaıyndaldy

ASTANA. KAZINFORM – «Qazaqstan» respýblıkalyq teleradıokorporatsııasynyń basqarma tóraǵasy taǵaıyndaldy. Bul qyzmetke Ernur Býrahan keldi.

«Qazaqstan» Ulttyq telearnasynyń Facebook paraqshasynda jarııalanǵan aqparatqa sáıkes,  Ernur Kósherhanuly Býrahan 1981 jyly 16 maýsymda Shyǵys Qazaqstan oblysynda dúnıege kelgen. Jýrnalıstıka salasynda 20 jyldan astam tájirıbesi bar. Ár jyldary «Qazaqstan» telearnasynda tilshi, telejúrgizýshi, «Qazaqstan» teleradıokorporatsııasynyń Aqtóbe oblystyq fılıalynyń dırektory, «Qazaqstan» teleradıokorporatsııasyna qarasty «Qazaq radıolary» JShS dırektory qyzmetterin atqardy. Sońǵy eki jylda Shyǵys Qazaqstan oblysy Іshki saıasat basqarmasynyń basshysy qyzmetinde boldy.

Al korporatsııany alty jyldan astam ýaqyt basqarǵan belgili medıamenedjer Lázzat Tanysbaı óz ótinishimen búgin qyzmetin aıaqtady. Búginnen bastap ol otandyq «Evrazııa» Birinshi arnasyna» jetekshilik etedi.

Osyǵan deıin Lázzat Tanysbaıdyń jańa qyzmetke taǵaıyndalǵany týraly jazdyq.