«Qazaqstan» teleradıokorporatsııasy UOS jeńimpazdary týraly jınaqtyń eń alǵashqy basylymyn Ulttyq mýzeıge tartý etti (FOTO)
«Jeńis kúnin jaqyndatý úshin janyn aıamaǵan ardager-jaýyngerlerge arnalǵan eńbegimizdi otandastarymyzdyń nazaryna usynýdy jón kórdik. Kúni keshe ǵana basylyp shyqqan jınaqty Qazaqstan Respýblıkasynyń Ulttyq mýzeıine el tarıhynan syr shertetin qundy jádiger retinde syıǵa tartamyz. Ulttyq arnanyń altyn qorynan alynǵan bul jınaqtardyń ishinde Baýyrjan Momyshuly, Roza Baǵlanova, Talǵat Bıgeldınov, Qasym Qaısenov tárizdi dańqty batyrlarymyzdyń daýystary saqtalǵan. Jınaqqa maıdangerlerdiń soǵys jyldary jazǵan hattary da engizildi. Bul eńbek Mýzeı tórinen ózine laıyqty ornyn alady degen senimdemiz. Mýzeı qyzmetkerleri men mýzeıge kelýshiler úshin bul taptyrmas tarıhı jádiger bolaryna kúmánimiz joq», - dedi «Qazaqstan» teleradıokorporatsııasynyń basqarma tóraǵasy jınaqty Mýzeı dırektory Darhan Myńbaıǵa tapsyrý rásimi kezinde.
«Qazaqstan» Respýblıkalyq teleradıokorporatsııasy Jeńistiń 70 jyldyǵyna oraı 2 aqpan men 9 mamyr aralyǵynda telekórermender nazaryna tarıhı-tanymdyq derekti fılmder toptamasyn usyndy. Barlyǵy 7 tolyq jáne 70 qysqametrajdy fılm daıyndaldy.
Mádenı-tarıhı qundylyqtardy saqtap, ony keleshek urpaqqa jetkizý maqsatynda «Eldiń erligi», «Maıdannan jazylǵan hat», «Jeńimpazdardyń asqaq daýysy», «Uly jeńiske - 70 jyl» atty 4 jeke kitap-dıskten turatyn «Jeńiske taǵzym» atty jınaq shyǵarý týraly sheshim qabyldandy.
«Eldiń erligi» - Jeńistiń 70 jyldyǵyna arnalǵan 7 serııadan turatyn tarıhı-tanymdyq derekti fılmder toptamasy. Bul Otan úshin surapyl soǵysta kúresken jaýyngerlerdiń, túrli qıyn jaǵdaılarda sheshim qabyldaı bilgen qolbasshylardyń, Jeńiske jetkizýge bar kúsh-jigerin salǵan tyl eńbekshileriniń ómirjazbasy.
70 qysqametrajdy fılmderden turatyn «Uly Jeńiske - 70 jyl» atty arnaıy jobada Reseı, Ýkraına, Belarýs muraǵattarynan tabylyp, budan buryn esh jerde kórsetilmegen qazaqstandyqtarǵa qatysty qujattar paıdalanyldy.
Fılm ýaqytyly madaqqa laıyq bola almaǵan batyrlar, habarsyz joǵalǵan jaýyngerler týraly, soǵys jyldarynda jedel kóshirilgen zaýyt-fabrıkalar týraly, eskerýsiz qalǵan erekshe áreketter týraly, Qazaqstanǵa erkinen tys kóshirilgen adamdardyń aýyr taǵdyry týraly baıandaıdy.
Budan basqa, ulttyq telearnanyń jáne «Qazaq radıosynyń» efırinen soǵys jyldarynda maıdannan jazylǵan hattar oqylyp, kórsetildi, keıin bul hattar korporatsııanyń resmı veb-portalynda jarııalandy. Osy hattardyń barlyǵy jeke jınaqqa júıelendirilip, «Maıdannan jazylǵan hattar» atty atpen káde kitap-syılyq túrinde shyǵaryldy. Muraǵatta saqtalǵan júzge jýyq hat jaryq kórdi. Olardyń ishinde Baýyrjan Momyshulynyń, Álııa Moldaǵulovanyń, Erǵalı Rysymbetovtiń, Dúısen Barjobaevtyń jáne taǵy basqalarynyń hattary da bar.
«Jeńimpazdardyń asqaq daýysy» atty sońǵy tórtinshi kitapta Qazaq radıosynyń Altyn qorynda saqtalǵan daýystar jınaqtaldy. Mysaly, 1965 jyly Jeńistiń 20 jyldyǵyna oraı jazylǵan Keńes Odaǵynyń Batyry Baýyrjan Momyshulynyń jáne Jeńistiń 30 jyldyǵyn toılaý qarsańynda 1975 jyldyń 7 mamyrynda jazylǵan Otan soǵysynyń 1-deńgeıdegi orden ıegeri, Qazaqstannyń halyq jazýshysy Dmıtrıı Snegınniń daýystary taspaǵa túsirildi.
