Qazaqstan telearnasynyń alǵash efırge shyqqanyna - 55 jyl
ASTANA. 8 naýryz. QazAqparat - Búgin «Qazaqstan» telearnasynyń alǵash efırge shyqqanyna 55 jyl toldy.
«Qazaqstan» Ulttyq telearnasyn, Qazaq radıosyn jáne aımaqtyq teleradıokompanııalardy biriktiretin «Qazaqstan» respýblıkalyq teleradıokorporatsııasy elimizdiń buqaralyq aqparat quraldary arasynda erekshe oryn alady. Ol Qazaqstandaǵy tele-radıojýrnalıstıkanyń úzdik dástúrin mura etip keledi. Onyń bastaýynda 1922 jyly negizi qalanǵan Qazaq radıosy men 1958 jyly qurylǵan respýblıkalyq birinshi telearna tur.
«Qazaqstan» - memleketimizdiń aqparattyq saıasatyn júzege asyratyn Ulttyq teleradıokorporatsııa. Turǵyndardy qamtý jaǵynan ol, sózsiz, aldyńǵy orynda. El turǵyndarynyń 98,63 paıyzy telearna habarlaryn kórip, tamashalaı alsa, Qazaq radıosyn turǵyndardyń - 88,74, «Shalqar» radıosyn - 61,31 paıyzy tyńdaı alady. Sondyqtan da, «Qazaqstan» Ulttyq telearnasy men aımaqtyq teleradıokompanııalarynyń sıgnaldary anyq taralatyn aımaqtarǵa kiretin Qazaqstandaǵy aýyl turǵyndarynyń, kem degende, jartysy úshin teledıdar aqparattyq jáne mádenı qajettilikti, bilim alýdy, demalysty uıymdastyrýdy qanaǵattandyratyn basty qural bolyp qala bermek.
Korporatsııanyń habar taratý saıasaty aqparattyq, aǵartýshylyq, oıyn-saýyqtyq baǵyttaǵy aqparat berýmen, ulttyq jáne álemdik mádenıettiń qundylyqtaryn, gýmanızm ıdeıalaryn jáne Qazaqstan halyqtary arasyndaǵy dostyqtyń dańqyn arttyrý men nasıhattaýmen sıpattalady.
Telearnada zamanǵa saı oılaıtyn ujym, talantty shyǵarmashylyq qyzmetkerler jumys isteýde. Korporatsııa jańa ınjenerlik-tehnıkalyq quraldarmen jabdyqtalǵan. Munyń bári qarqyndy damyp kele jatqan qoǵamnyń erekshelikterin jáne kórermender men tyńdarmandardyń aqparattyq-aǵartýshylyq qajettilikterin eskere otyryp, sapaly efırlik ónim óndirýge kepildik beredi. 2001 jyldan bastap jańa menedjerler komandasynyń kelýimen jańa habarlar tsıkli, qyzyqty tok-shoýlar paıda bolyp, kórermender men tyńdarmandardyń sany artty. Teleradıokorporatsııanyń qazirgi zamanǵa saı bet-beınesi qalyptasyp, qarqyndy túrde damı bastady.
«Qazaqstannyń» basty ıdeıalyq quramy - qazaqstandyq patrıotızm, halqymyzdyń tarıhı jáne rýhanı murasyn saqtap, bolashaqqa jetkizý, ulttyq qundylyqtarymyzdy kórermenderiniń sanasyna sińirý, zamanaýı quraldar arqyly ulttyq basty aqparat kózderiniń biri bolý.
Elbasynyń tikeleı tapsyrmasy boıynsha «Qazaqstan» ulttyq arnasy 2011 jyldyń qyrkúıeginen 100% qazaq tilinde habar tarata bastady. Sonymen qatar, korporatsııa quramynda ulttyq mádenıetimizdi ulyqtaıtyn «Mádenıet» telearnasy, balalarǵa arnalǵan «Balapan» telearnasy iske qosyldy.
Jaqynda BAQ arqyly «TNS Gellap Medıa Azııa» (TNSGallupMediaAsia) zertteý kompanııasynyń málimetteri boıynsha «Qazaqstan» ulttyq telearnasynyń 100 myńnan tómen turǵyndary bar eldi mekender, ıaǵnı shaǵyn qalalar, aýdandar men aýyl turǵyndary arasynda 23,3% ortasha táýliktik úles kórsetkishimen birinshi orynǵa taban tiregeni málim boldy. Eń aldymen, bul qazaq kórermeniniń jeńisi dep aıtýǵa bolady.
