«Qazaqstan» telearnasyndaǵy «páter daýy» (FOTO)

ASTANA. Qazaqparat - «Qazaqstan» telearnasy óziniń jańa hıkaıalarymen kórermenderdi taǵy da tańǵaldyrady. 10 qazan kúni telearnada «Jańa qonys» komedııalyq sıtkomynyń tusaýkeseri ótedi, dep habarlady ulttyq arnanyń baspasóz qyzmeti.

Telehıkaıanyń negizgi sıýjettik jelisi úlken qalada páter jaldaıtyn otbasynyń bastan keshken qyzyqty oqıǵalary. Hıkaıa keıipkerleriniń basynan ótken oqıǵalar kez kelgen kórermenge tanys jaǵdaı. Kúndelikti turmystaǵy kelispeýshilikter oń qyrynan kórsetilip, kórermenderge tanys qyzyqty oqıǵalar kez kelgen jandy kúldireri anyq. Keıipkerlerdiń obrazynan kórermenderimiz ózderin kóre alady! Hıkaıany jasaýshylar bas keıipkerlerdiń basynan ótken qyzyqty oqıǵalar kópshiliktiń kóńilinen shyǵyp, hıkaıa kórermenderdiń júregin jaýlaıdy dep úmittenedi.

12 serııa barysynda biz qarapaıym aýyldan úlken qalaǵa qonys aýdarǵan Myrzahanovtar otbasy músheleriniń áreketterin baqylaımyz.

Otbasylyq qarajattary ózderine jeke páter satyp alýǵa jetpegendikten, olar ýaqytsha páterdi jaldap turýǵa sheshim qabyldaıdy. Hıkaıa barysynda Myrzahanovtar túrli qarjylyq qıyndyqtarǵa ushyrap, páterdi jalǵa alý uzaqqa sozylsa, óz páterin satyp alý týraly asqaq arman jyl saıyn alystaı túsedi. Nátıjesinde, qalada olar turmaǵan aýdan qalmaıdy.

Myrzahanovtarǵa týǵan aýylǵa qaıta kóship, sharýashylyqpen aınalysyp, berekege keńelýge de bolar edi. Alaıda, qalanyń kóptegen qıyndyqtaryna qaramastan, oǵan namystary jibermeıdi. Eńbek terimen tapqan-taıanǵanyn páter ıesine beredi. Qaladaǵy turmystaryn jalǵastyryp, óz shańyraqtaryna qol jetkizýdi armandaıdy.

Hıkaıanyń epızodtary «usaq turmystyq máselelerdi» jeńil, ári kúlkimen qabyldaýǵa múmkindik beredi.

«Jańa qonys» hıkaıasynyń qoıýshy-rejısseri Jeńishan Momyshev, prodıýseri - Dastan Qaldybaev. Bul shyǵarmashylyq toptyń enshisinde «Toıbastar», «Túngi stýdııa» («Qazaqstan»), «Shataqhana» («Habar»), «Qyzyqstan» («Elarna»), «Ázil-Stýdıo», «Qazaqsha kontsert», «Rızamyn» («31 kanal») jáne taǵy basqa jobalar bar.

Sondaı-aq, akterlerdiń de juldyzdy quramasyn atap ótken jón: Qýandyq Shákirjanov, Baqyt Álipbaeva, Juldyz Mahanova, Nursultan Jaqsygenov, Dastan Qaldybaev jáne Saıagúl Orazǵalıeva.

«10 qazan kúni «Qazaqstan» telearnasynda jańa komedııalyq telehıkaıany ótkizip almańyzdar! Kóterińki kóńil-kúıdi ár senbi kúni saǵat 14.35-te syılaıtyn bolamyz!», - delingen habarlamada.