«Qazaqstan» telearnasynda jańa otandyq «Bizdiń aǵaı» telehıkaıasynyń tusaýy kesiledi (FOTO)
ASTANA. QazAqparat - 12 qazan kúni «Qazaqstan» telearnasynda 16 serııalyq «Bizdiń aǵaı» komedııalyq telehıkaıasynyń tusaýkeseri ótedi. Telehıkaıa zeınetkerlikke shyǵyp, tanymal bloger jáne jastardyń tálimgeri atanǵan aýyl aqsaqalynyń ómiri týraly baıandaıdy, dep habarlaıdy telearnanyń baspasóz qyzmeti.
Bul qyzyqty oqıǵa zamanaýı ómirdi beıneleıdi. Oqıǵa Jambyl oblysynyń Shý aýdanynda ótedi. Bas keıipkerler - Jomart aǵanyń otbasy jáne aýyldastary. Jomart uzaq jyldar aýyldyq mektepte tarıh pániniń muǵalimi bolǵan. Ómir boıy súıikti qyzmetimen aınalysqan aqsaqal zeınetkerlikke shyǵady. Mundaı adam úıde tynysh otyra almaıtyny belgili. Aıaq astynan aýyldastarynyń aqylshysyna aınalǵanyn Jomart aǵanyń ózi de baıqamaı qalady...
Sonymen qatar, bul hıkaıa adam júreginde týǵan jer men eldiń erekshe oryn alatynyn baıandaıdy.
Hıkaıanyń taǵy bir keıipkeri - Elaman (Edýard). Ol osydan birneshe jyl buryn tarıhı otany Almanııaǵa qonys aýdarǵan, qazaq eline qonaqqa jıi kelip turady. Týǵan ólkege degen saǵynyshy tynysh taptyrmaıdy. Sheteldik kýrorttyq jerlerden ábden jalyǵady. Aýyl adamdary men aýyldaǵy shaǵyn ǵana úıi - janǵa jaıly, ystyq mekenin ańsaıdy...
Týyndynyń rejısseri - Murat Bıdosov. Rejısser «Ápke», «Agent Z» jáne t.b. telehıkaıalarymen tanymal.
Týyndy ázil-ospaqqa negizdelse de, otansúıgishtik, úlkenderge degen qurmet, Otanǵa, otbasyǵa degen mahabbat taqyryptary keńinen nasıhattalady. Hıkaıa barysynda otandyq óndiris ónimi jáne zamanaýı tehnologııa jetistikteri kórsetiledi.
«Bizdiń aǵaı» telehıkaıasy 12 qazannan bastap jumys kúnderi saǵat 21.00-de kórsetiledi.
