«Qazaqstan» telearnasynda «Shyn júrekten» telemarafony ótip jatyr

ASTANA. QazAqparat - Búgin «Qazaqstan» ulttyq arnasynda «Shyn júrekten» dep atalatyn telemarafon bastaldy. Qaıyrymdylyq pen izgilikti nasıhat qylatyn, taǵdyr talaıymen túrli dertke ushyraǵandarǵa kómek kórsetýdi kózdeıtin bul shara keshke deıin jalǵasady, dep habarlaıdy arnanyń baspasóz qyzmeti.

Telemarafonǵa ulttyq arnanyń aımaqtardaǵy fılıaldary da qosylmaq.

Ulttyq arna uıymdastyryp jatqan telemarafonda áý basta 4 balaǵa kómek kórsetý josparlanǵan-dy. Biraq, qaıyrymdylyq isi tek bularmen shektelmek emes. Ózge de ıgi ister josparlanǵan. Sharaǵa barlyq aımaqtardyń turǵyndary qatysyp jatyr.

«Qazaqstan» RTRK» AQ qyzmetkerleri de óz kómekterin aıaǵan joq. Árkim ártúrli deńgeıde qarjylaı kómek kórsetti. Al, telemarafon kezinde stýdııaǵa kelgen qonaqtar jaqsylyq jasaýdyń, adam balasynyń bir-birine kómeginiń mańyzdylyǵyn aıtyp, ǵıbratta áńgimeler aıtýda.

«Shyn júrekten» telemarafony kezinde stýdııaǵa Qazaqstan halqy Assambleıasy Tóraǵasynyń orynbasary, Qazaqstan halqy Assambleıasy Hatshylyǵynyń meńgerýshisi Eraly Toǵjanov. QR Parlamenti Májilisiniń depýtaty, Balalar ombýdsmeni Zaǵıpa Balıeva, QR Eńbek sińirgen qaıratkeri, jazýshy Sultan Orazalın syndy azamattar qatysty. Marafon barysynda arnanyń Astanadaǵy stýdııasyna áli de talaı qonaqtar keletini sózsiz. Bastysy kómekke zárý jandarǵa kómek kórsetý úshin ashylǵan esep-shot buqaraǵa tanystyrylyp jatyr. Shara keshki 22.00-ge deıin jalǵasady.