«Qazaqstan» telearnasynda serıaldardy irikteıtin Sarapshylar keńesi quryldy
ASTANA. QazAqparat - «Qazaqstan» ulttyq arnasynda teleserıaldardy irikteýmen aınalysatyn Sarapshylar keńesi quryldy. Bul týraly teleradıokorporatsııa basshysy Erlan Qarın Feısbýktegi paraqshasynda jazdy, dep habarlaıdy «QazAqparat» HAA tilshisi.
«Qazaqstan» teleradıokorporatsııasy teleserıaldardyń sapasyn arttyrý maqsatynda, korporatsııaǵa kelip túsken jobalardy irikteıtin Sarapshylar keńesin qurý jaıly sheshim qabyldady. Jańa reglamentke sáıkes baıqaý komıssııasynyń alǵashqy irikteýinen ótken jobalar Sarapshylar keńesiniń taldaýyna usynylatyn bolady. Sarapshylar keńesiniń quramyna elimizdiń tanymal qoǵam qaıratkerleri, óner tanýshylar men belgili jýrnalıster kirdi», - dep jazdy telearna basshysy.
Erlan Qarınniń habarlaýynsha, Sarapshylar keńesiniń quramyna belgili memleket jáne qoǵam qaıratkeri Myrzataı Joldasbekov, «Aıqyn gazeti» JShS-nyń dırektory ári bas redaktory Nurtóre Júsip, kınotanýshy Nazıra Muqysheva, tarıhshy Berik Ábdiǵalı, QR Parlamenti Májilisiniń depýtaty Baqytbek Smaǵul, belgili jýrnalıster Sáken Sybanbaı men Tólegen Baıtúkenov engen.
«Búgin Sarapshylar keńesiniń alǵashqy otyrysy ótti. Otyrys barysynda árbir joba muqııat talqylanyp, keńes músheleri óz baǵasyn berip, usynystaryn aıtty. Al kelesi kezeńde prodakshn kompanııalardyń ókilderi óz jobalaryn osy keńes músheleriniń aldynda qorǵaıtyn bolady», - dep jazdy Erlan Qarın.
