«Qazaqstan» telearnasynda R.Otarbaevtyń shyǵarmasy boıynsha túsirilgen «Qazyna» telehıkaıasy kórsetiledi
ASTANA. QazAqparat - 2 maýsym kúni jastardy otansúıgishtikke tárbıeleıtin jańa, 16 bólimnen turatyn «Qazyna» telehıkaıasy «Qazaqstan» telearnasynyń efırine shyǵady, dep habarlaıdy arnanyń baspasóz qyzmeti.
Jobanyń sıýjeti tanymal jazýshy-dramatýrg, "Parasat" ordeniniń ıegeri Raqymjan Otarbaevtyń «Jumbaqtaý qazynasy» kitabyna negizdelgen jáne otanyna oralǵan qazaq jaıynda baıandalady. Hıkaıada qoǵamda keńinen etek jaıǵan nashaqorlyq, Aýǵanstannan Eýropaǵa tasymaldanatyn esirtki bıznesi týraly da sóz bolady. Fılmniń rejısseri - Ánýar Raınbekov.
Sıýjet jelisi boıynsha, qýǵyn-súrgin zamanynda basqa elge aýyp ketken aýǵan qazaǵy Alı (Jandos Aıbasov) tarıhı Otanyna oralady. Qıyn-qystaý zamanynda ata-babalary «Jumbaqtaý» baýraıynda qazyna jasyryp ketken. Sol ýaqyttan beri Alıdiń eshqandaı arǵy-tegi bul baılyqqa qol jetkize almaǵan. Atasy óler aldynda basty keıipkerge osy týraly aıtyp, dúnıeni muqtaj jandarǵa bólip berýin tapsyrady. Ári qaraı sıýjet qazynaly baılyq izdeýdegi qazaq balasy jaıynda órbıdi. Oǵan jetý jolynda basty keıipker Gaýhar esimdi mahabbatyn (Maqpal Isabekova) keziktirip, qyzmetin adal atqaratyn Azamat Aıtalıev degen ofıtsermen (Erik Joljaqsynov) dos bolady.
Endeshe, jiberip almańyzdar! 2 maýsym kúni saǵat 21.50-de «Qazaqstan» telearnasynda rejısser Ánýar Raınbekovtyń «Qazyna» telehıkaıasynyń tusaýkeseri, dep habarlaıdy «Qazaqstan» telearnasynyń baspasóz qyzmeti.
