«Qazaqstan» telearnasynda «Namys doda» oıynynyń jańa maýsymy bastalady (FOTO)
ASTANA. QazAqparat - 2 qazan kúni «Qazaqstan» telearnasynyń efırinde tanymal «Namys doda» oıynynyń jańa maýsymy bastalady, dep habarlaıdy Qazaqstan» RTRK» AQ baspasóz qyzmetinen.
Osy jyly joba erejeleri ózgerdi. Endi qatysýshylar árbir oıynǵa jáne árbir saıysqa qatysýǵa mindetti. Budan buryn «Chempıon qabyrǵasy» oıyny upaı sanyn túgendeý kezinde sheshýshi ári mańyzdy kezeń bolatyn. Al osy maýsymda upaı sany ár oıyn aıaqtalǵannan keıin eseptelip, eń sońynda barlyq kezeńder boıynsha jalpy upaı sany shyǵarylady.
Esterińizge sala keteıik, «Namys doda» oıynynyń túsirilimderi alǵash ret Haınan aralyǵynda ornalasqan qytaıdyń Haıkoý qalasynda ótkizildi. Qazaqstan quramasynyń qarsylastary Qytaı, Vengrııa, Frantsııa jáne Aljır. Bul rette, 2007 jyly ótkizilgen týrnırde Qazaqstan tórtinshi oryndy, 2008 jyly júldeli ekinshi oryndy ıelense, al 2012 jyly jeńimpaz atanyp, bas júldeni utyp alǵan bolatyn.
Bul maýsymdaǵy qazaqstandyq quramanyń bas bapkeri - aralas jekpe-jek boıynsha álemniń úsh dúrkin chempıony, Eýrazııa jáne Azııa chempıony, MMA boıynsha álem kýbogynyń ıegeri Ardaq Nazarov.
Qatysýshylardyń quramynda Qazaqstannyń belsendi jáne tanymal ókilderi: olımpıada chempıondary, ártúrli sport túrleri boıynsha álem chempıondary, óner zııalylary jáne basqalary da qatysady.
Qazaqstannyń quramynda el namysyn qorǵaıtyndar negizinen túrli jekpe-jek ókilderi. Mysaly, saıystarǵa Qazaqstannyń boks boıynsha birneshe dúrkin álem chempıony jáne Londonda ótken Olımpıada qatysýshysy Saıda Hasenova, jas kásipqoı boksshy Janqosh Turarov, Qazaqstannyń jastar quramasynyń voleıbolshysy Álııa Batquldına, sambo boıynsha eki dúrkin álem chempıony Raısa Baılıeva jáne taǵy basqalary. Sondaı-aq, oıynǵa qatysýshylarǵa qazaqstandyq tanymal óner juldyzdary qoldaý kórsetti.
Jobanyń aýdıtorııasyn olımpıada oıyndarymen salystyrýǵa bolady. Oıyn aýdıtorııasy eki mıllıard adamdy quraıdy. Bul - televızııa damýynyń barlyq álemdik tendentsııalaryna sáıkes keletin úlken kólemdegi jáne joǵary sapadaǵy otandyq televızııadaǵy jalǵyz shoý. Elimizdiń osyndaı kólemdegi halyqaralyq jobaǵa qatysýy respýblıkamyz úshin iri oqıǵa bolyp sanalady.
«Namys doda» jobasynyń prodıýseri Altynbek Rahmetov: «Oıynnyń bastalýyna eki apta qalǵanda qatysýshylardyń qujattaryn (olardyń jalpy sany toqsanǵa jýyq) rásimdeýden bastap, Qytaıǵa barǵanǵa deıin birshama qıyndyqtar týyndady. Jalpy, Qytaıǵa ushý ártúrli jerlerde toqtaýmen on bes saǵat ýaqytymyzdy aldy. «Namys dodanyń» túsirilimi Ramazan aıynda ótti. Oıynǵa qatysýshylardyń teń jartysy oraza tutqan edi. Haınan aralynda kóleńkeniń ózinde temperatýra 50 gradýs ystyq boldy. Bul joly qarsylastarymyz bárimizdi qatty tańqaldyrdy. Oıynǵa jaqsy daıyndalǵandary kórinip turdy. Alaıda, eshbir qıyndyqtarǵa qaramastan, bizdiń qatysýshylarymyz el namysyn qoldan bermeýge baryn saldy. Kóptegen kúrdeli kezeńder, qyzyqty oıyndar boldy. Óz tarapymyzdan kórermenderge tosyn syı jasadyq, biraq buny telearna efırinen bile alasyzdar», - dedi.
«Namys doda» telejobasyn «Qazaqstan» telearnasynyń efırinen 2 qazannan bastap juma kúnderi saǵat 21.05-te, jeksenbi kúni saǵat 15.00-de qaıtalaýyn tamashalaı alasyzdar.
