«Qazaqstan» telearnasynda qazirgi zamannyń batyrlary jaıly realıtı-shoý jaryq kóredi
ASTANA. QazAqparat - «Qazaqstan» telearnasy jańa televızııalyq maýsymda tosyn áleýmettik joba usynbaq. Teleradıokorporatsııanyń baspasóz qyzmeti habarlaǵandaı, 7 qyrkúıek kúni saǵat 19.00-de «Qazaqstan» telearnasynda realıtı-shoý janrynda túsirilip jatqan «Shyn júrekten» baǵdarlamasynyń alǵashqy sany efırge shyǵady.
Atalmysh jobanyń basty maqsaty - tasada qalǵan qazirgi zamannyń batyrlary dep aıtýǵa turatyn keıipkerlerdiń erlik áreketin jan-jaqty baıandaý. Onyń óz jeke basynan ótkizgen eń qyzyqty, áserli sátteri tańdalyp alynyp, kórermender nazaryna usynylmaq.
Kóbinese meıirimdi jandar ózderiniń jaqsy isteri jaıly aıtyp jatýdy unata bermeıdi. Biraq biz osyndaı erekshe erlik, jaqsylyq ıeleri týraly eldiń bilgenin qalaımyz jáne «Shyn júrekten» arqyly sol adamdardy kópshilikke úlgi etemiz. Baǵdarlama emotsııaǵa toly. Oryndy oıyn men ádemi ázil baǵdarlamanyń kórkin ashpaq.
Basyn qaterge tigip, jalyndaǵan ot ortasynan adam ómirin qutqarǵan órt sóndirýshi, jetimdi jylatpaı, oǵan analyq qamqorlyǵyn syılaǵan asyl jan, naýqasty ajal aýzynan arashalap qalǵan dáriger, bir sózben aıtqanda, jarymjan kóńilge qýanysh syılap, aınalasyndaǵylarǵa bergeni mol, biraq, ózi tasada qalǵan jandar týraly shytyrmanǵa toly oqıǵalar jańa jobanyń arqaýyna aınalady.
