«Qazaqstan» telearnasynda habar taratý jelisin baǵdarlamalaýdyń jańa joldary engizilýde
ASTANA. 13 naýryz. QazAqparat - «Qazaqstan» UTA Baǵdarlamalyq dırektory Sáýle Jırenshına Ortcom.kz-ke telearnanyń habar taratý jelisin baǵdarlamalaýdyń jańa joldary, otandyq televızııalyq ónim jasaý jáne telearnany tehnıkalyq jańǵyrtý jaıly áńgimeledi.
«Aqparattyq aktıvpen kezdesýi barysynda Memlekettik hatshy aqparattyq jumysty jańǵyrtý jóninde, onyń ishinde memlekettik telearnalar aldyna da birqatar mindetter qoıdy. Qazirgi kezde «Qazaqstan» telearnasynda qazaqstandyq kontent kúsheıtilip, reıtingisi tómen jobalar qysqartylýda», - dedi Sáýle Jırenshına.
«Qazaqstan» UTA habar taratý jelisin tıimdi ornalastyrý úshin, TNS Gallup Media-nyń maqsatty aýdıtorııalar boıynsha taldaý jasalatyn esebi kún saıyn qadaǵalanyp otyrylady, dep habarlaıdy QR Prezıdenti janyndaǵy Ortalyq kommýnıkatsııalar qyzmeti.
«Habar taratý jelisin baǵdarlamalaýdyń jańa joly oılastyryldy. Mysaly, nóldik reıtıng beriletin saǵat 18.00 ben 19.00 arasy qaıta qaraldy. Reıtıngisi tómen ónimderdiń ornyna sońynan jaqsy kórsetkishter kórsetetin otandyq serıaldardy jiberýge sheshim qabyldandy», - dep habarlady «Qazaqstan» telearnasynyń baǵdarlamalyq dırektory.
Budan basqa, sheteldik kontentti satyp alý qysqartylyp, bıýdjet qarjysy ózimizdiń televızııalyq ónimderimizdi óndirýge jumsalatyn bolady.
«Qazaqstan» UTA-da baǵdarlamalaýdyń kólbeý tásili engizilýde, munda maqsatty aýdıtorııaǵa unaıtyn janrlar jónindegi jobalardyń turaqty sloty qalyptastyrylady. Sondaı-aq juma men demalys kúnderi úshin arnaıy baǵdarlamalaý engiziledi», - dedi Sáýle Jırenshına.
Ol sonymen qatar tehnıkalyq jańǵyrtý maqsatynda TV óndirisiniń barlyq kezeńinde taspasyz tehnologııa birtindep engizile bastaıdy dedi. Aqparattyq-taldaý baǵdarlamalaryn qalyptastyrý jáne materıaldy efırge berý barysynda VIZART baǵdarlamasy belsendi túrde qoldanylýda.
«Bul otandyq telehabar taratýda halyqaralyq standarttardy qamtamasyz etýdiń taǵy da bir qadamy bolmaq», - dep qorytyndylady sózin "Qazaqstan" UTA Baǵdarlamalyq dırektory Sáýle Jırenshına.
