«Qazaqstan» telearnasynda «Eki juldyzdyń» tórtinshi maýsymy bastalmaq
ASTANA. 19 qyrkúıek. QazAqparat - «Eki juldyz» burynǵydan da jarqyraı túspek. Otandyq óner juldyzdarynyń osynsha shoǵyry qatysyp, vokal men akterlik qabiletin synǵa salatyn joba elimizde buryn-sońdy bolǵan emes! Bul týraly «Qazaqstan» telearnasynyń saıtynda habarlandy.
Juldyzdy juptardyń mindeti - tek sahnaǵa shyǵyp án aıtý ǵana emes, ózge qarsylastarynan artyqtyǵyn kórermenge dáleldeı bilý. Ol úshin saıyskerler álemdik hıtter men básekelesteriniń repertýarlaryndaǵy týyndylardy oryndap, túrli janrdy erkin meńgere alatynyn kórsetedi jáne alýan túrli obrazdarǵa enedi. Alaıda, joba juldyzdardyń ásem áýenderi men áserli qoıylymdaryn nazarǵa usynatyn dýmandy baǵdarlama ǵana emes, ár sany saıyn bir juppen qosh aıtysýǵa týra keletin drama. Ótken maýsymdarda qazylar alqasy bir kótergen baǵasyn ózge jupqa qoıa almaı, qınalatyn ereje bul maýsymda júrmeıdi jáne ár jup baǵasyn bilgenshe habardyń sońyn kútip ýaıymdamaıdy, óner kórsetkennen keıin birden biledi. Al juptardy baǵalaýdaǵy kórermen quqyǵy burynǵydaı. 50 paıyz daýysqa ıe.
«Eki juldyz» jobasynyń tarıhynda tuńǵysh ret juptar tek kásibı ánshilerden quralady. Bul prodıýserlerge álemge áıgili «Juldyzdy jekpe-jek» kınofılmine sáıkes álqıssalar jasaý týraly oı saldy. Sondyqtan, qazaq kórermenderine usynylatyn eń birinshi tosynsyı baǵdarlama ańdatpasyndaǵy juldyzdardyń beıneleri. Treıler- ańdatpalardy «Qazaqstan» Ulttyq arnasynan jáne ǵalamtordan kórýge bolady. Túsirilgen ańdatpa biraz qatysýshylardyń esimin elge jarııa etedi. Olar: Beıbit Qorǵan, Aıqyn Tólepbergen, Aqylbek Jemeneı, Janna Orynbasarova, Jeńis Ysqaqova, Aıjan Nurmaǵambetova, «Azııa» tobynyń ánshisi Erbol Shárip pen «Alaý» dýeti. 4-shi maýsymnyń júrgizýshileri: otandyq estrada juldyzy Nurlan Abdýllın, belgili kınoakter Nurlan Álimjan jáne telejúrgizýshiler Maııa Veronskaıa men Tahır Sultan.
Jańa maýsym taqyryptarymen de erekshe. «Eki juldyz» jobasynda tuńǵysh ret bir habar qazaq estradasynyń ańyz ánshisine aınalǵan, QR Halyq ártisi Roza Rymbaevanyń shyǵarmashylyǵyna arnalyp otyr. Sonymen qatar, kúlli álemdi dúrkiretken, kári qurlyq jastaryna arnalǵan «Evrovıdenıe» baıqaýynyń ánderi de «Eki juldyz» sahnasynda shyrqalmaq. Ár dýman otandyq jáne sheteldik juldyzdardyń qatysýymen jarqyraı túspek.
Bul maýsymda jobany nasıhattap júrgen baspasóz ókilderi de nazardan tys qalmaıdy. BAQ ókilderine arnaıy oryn bólinip, ár baǵdarlamanyń túsirilimine qatysýǵa múmkindik alyp, daýys berý nátıjesi men juldyzdy jobada bolyp jatqan jańalyqtardi birinshi bolyp bile alady.
Naǵyz dúldúlderdiń dodasy «Qazaqstan» ulttyq arnasynda 24 qyrkúıekten bastap, ár senbi saıyn kórsetiletin bolady.
