«Qazaqstan» telearnasy qarasha aıynda kórermenderin jańa otandyq ónimmen qýantady (FOTO)
ASTANA. QazAqparat - «Qazaqstan» telearnasy kórermenderin osy jyldyń qarasha aıynda jańa otandyq ónimmen qýantady. Osy joly telekórermenderdiń nazaryna 32 serııalyq «Tańdaý» kórkem telehıkaıasy usynylady.
Bul týraly «Qazaqstan» RTRK» AQ baspasóz qyzmeti habarlady.
Hıkaıanyń basty keıipkerleri jańa ǵylymı jobany ashýǵa umtylǵan tórt dos jaıly. Keıipkerler arqyly naǵyz dostyqtyń úlgisi kórsetiledi. Shetelden kelip túsken kóptegen usynystarǵa qaramastan, olar óz úlesterin týǵan eldiń damýyna qosýdy kózdeıdi. Kóptegen qıyndyqtardy bastan ótkergennen keıin, memleketten qoldaý alýdan úmit úzip, ınvestıtsııalardy jan-jaqtan izdeı bastaıdy. Telehıkaıa aıaqtalar tusta otandyq IT kompanııanyń basshylyǵynan kómek suraǵan kezde ǵana elimizde óz isin damytýdyń barlyq sharttary men birdeı múmkindikteri jasalǵanyn biledi.
«Tańdaý» hıkaıasynyń dramalyq sıýjetinde, eń aldymen, qazaqstandyqtardyń zııatkerlik ult ekeni kórsetiledi.
Atalǵan telehıkaıa otansúıgishtiktiń negizin qalyptastyrýdy sıpattap, óskeleń urpaqqa óz memleketiniń damýyna bilimderi men úlesterin qosý maqtanarlyq jaıt ekenin túsindiredi.
Hıkaıa rejısseri Aıdyn Sahamanov («Qara shańyraq, «Taǵdyr», «Voprekı vsemý», «Podrýjkı» jáne t.b. telehıkaıalardyń rejısseri), stsenarıı avtory - Lázzat Túlkibaeva.
Kartınaǵa Ábilmansur Serikov, Áshim Ahmetov, Eslıam Nurtazın, Baqtııar Baıserik, Araı Rahmet, Gúlbahram Baıbosynova, Baqtııar Qoja, Kúljamal Qazaqbaeva jáne taǵy basqa tanymal akterler qatysady.
Osy jyldyń qarasha aıynda elimizdiń damýyna óz úlesterin qosýǵa ázir, jańasha oılaýdyń ıeleri týraly dramany «Qazaqstan» telearnasynan jiberip almańyzdar.
