«Qazaqstan» telearnasy Golovkın-Ýeıd jekpe-jegin dál boljaı alǵan adamǵa syılyq daıyndap otyr
ASTANA. QazAqparat - 23 sáýir kúni (Astana ýaqytymen 24 sáýir) WBA (Super), IBO, WBC (Interim) jáne IBF nusqalary boıynsha orta salmaqtaǵy Álem chempıony, qazaqstandyq Gennadıı Golovkın (34-0, 31 KO) amerıkalyq boksshy Domınık Ýeıdke (18-0, 12 KO) qarsy jekpe-jekke shyǵady. «Qazaqstan» Ulttyq telearnasy men «kaztrk.kz» saıty jekpe-jekti 24 sáýir kúni 07:20-dan bastap tikeleı efırde kórsetýdiń eksklıýzıvti quqyǵyna ıe boldy.
Osyǵan oraı, «Qazaqstan» RTRK kórermender arasynda baıqaý jarııalaǵan bolatyn. Onyń sharty boıynsha, qatysýshylar jekpe-jektiń nátıjesin, ıaǵnı kimniń, qalaı jáne qashan jeńiske jetetinin boljam retinde durys ári naqty tabýy qajet. Kórermender men jankúıerler belsendi qatysyp, óz jaýaptaryn jiberip jatyr. Osy ýaqytqa deıin redaktsııaǵa barlyǵy 1 329 boljam kelip túsken.
Aıta keteıik, baıqaý Golovkın-Ýeıd jekpe-jegi bastalǵanǵa deıin jalǵasady. Jaýaptaryńyzdy myna https://vote.kaztrk.kz/boxing silteme arqyly ótip, boljamdy berýge bolady. Jeńimpaz sol kúni anyqtalady. Baǵaly syılyqty kezdesý nátıjesin naqty anyqtaǵan kórermen ıelenedi.
