«Qazaqstan» telearnasy Golovkın men Ýeıd jekpe-jegin tikeleı efırde kórsetedi
ASTANA. QazAqparat - WBA (Super), IBO, WBC (Interim) jáne IBF nusqalary boıynsha orta salmaqtaǵy álem chempıony, qazaqstandyq Gennadıı Golovkın (34-0, 31 KO) 23 sáýir kúni (Astana ýaqytymen 24 sáýir) amerıkalyq boksshy Domınık Ýeıdke (18-0, 12 KO) qarsy jekpe-jekke shyǵady. Kezdesý AQSh-tyń Los-Andjeles qalasyndaǵy «Forým» arenasynda ótedi.
Jekpe-jekti 24 sáýirde 07:20-dan bastap «Qazaqstan» Ulttyq telearnasy men kaztrk.kz saıty tikeleı efırde kórsetedi.
Gennadııdiń osyǵan deıin avstralııalyq Denıel Gıl, meksıkalyq Marko Antonıo Rýbıo, amerıkalyq Vıllı Monro II men Stıven Kertıs jáne kanadalyq Davıd Leme sekildi myqty boksshylarmen judyryqtasyp, jeńiske jetkenin aıta ketken jón.
Amerıkalyq boksshy Domınık Ýeıd osyǵan deıin 18 kezdesý ótkizip, barlyǵyn jeńispen aıaqtaǵan. Sonymen qatar, 12 kezdesýinde qarsylastaryn merziminen buryn utqan. Ol sońǵy kezdesýin byltyr 26 maýsymda avstralııalyq boksshy Sem Solımanǵa qarsy ótkizip, jeńiske jetken.
Eske sala keteıik, Gennadıı Golovkın sońǵy jekpe-jegin 2015 jyldyń 18 qazany kúni kanadalyq Davıd Lemege qarsy ótkizip, 8-raýndta nokaýtpen utqan.
Lemege qarsy urys Golovkın úshin erekshe mańyzǵa ıe. Sebebi, jekpe-jekti HBO telearnasy aqyly túrde Pay-Per-View júıesimen kórsetip, 150 myńnan astam abonementti satqan bolatyn. Bul AQSh jerinde jekpe-jek ótkizgen sheteldiń azamaty úshin joǵary kórsetkish sanalady.
Al otandastary úshin Golovkın-Leme jekpe-jegi naǵyz sporttyq mereke boldy. 3,5 mıllıon qazaqstandyq jankúıer demalys kúni ekenine qaramastan bul jekpe-jekti «Qazaqstan» Ulttyq telearnasynan tamashalaǵan. Bul rektordtyq kórsetkish! Sondaı-aq, osy kezdesýdi 1 mln kórermen telearnanyń resmı www.kaztrk.kz saıtynan kórgen. Al, jekpe-jektiń qaıtalaýyn 1,5 mıllıonnan asa jankúıer tamashalaǵan.
24 sáýirde «Qazaqstan» telearnasy saǵat 15.00 jáne 19:00-de Golovkınniń Ýeıdke qarsy jekpe-jegin qaıtalap kórsetedi. Al «Kazsport» telearnasy men kazsporttv.kz saıty 24 sáýirde 23.15-te, 25 sáýirde saǵat 09:00-de, 22:00-de jáne 1 mamyrda saǵat 23:00-de jekpe-jekti qaıtalap kórsetedi.
