Qazaqstan tek tsıfrlyq kún tártibimen ómir súrip jatyr - Baqytjan Saǵyntaev
«Búginde Qazaqstan tek qana tsıfrlyq kún tártippen ómir súrip jatyr jáne Úkimettiń negizgi mindeti osydan bir jyl buryn qabyldanǵan baǵdarlamany ómirde júzege asyrýǵa baǵyttalǵan. Mundaı baǵdarlamany qabyldamaı turyp, osydan 10 jyl buryn memlekettik qyzmetterdi tsıfrlyq formatqa kóshirýge jónindegi baǵdarlamany iske qostyq. Ýaqyt óte kele bir ǵana memlekettik qyzmetterdi usynýmen shektelýge bolmaıtyndyǵyn túsindik», - dedi QR Úkimet basshysy.
Osy rette Baqytjan Saǵyntaev Qazaqstan Prezıdenti Nursultan Nazarbaevtyń tsıfrlandyrý tek qana bir salaǵa emes, búkil ekonomıkamyzdy damytýǵa qatysty ekendigin aıtqanyn eske saldy.
«Úkimet mundaı qyzmetti óz moınyna alyp otyr. Eń birinshi kezekte bul tsıfrlyq formatta memlekettik qyzmetterdiń tolyq kólemin usynýmen baılanysty. Qazirgi ýaqytta densaýlyq saqtaý salasyn tsıfrlyq formatqa keltirýdemiz. Bilim berý salasynda biz tsıfrlyq formatta jumys istep jatyrmyz. Sońǵy 8 aıdyń ishinde 13 mıllıon memlekettik qyzmetti tsıfrlyq formatta kórsettik», - dedi Baqytjan Saǵyntaev.
Sonymen qatar ol elimiz «Doing Business 2018» reıtınginde jaqsy nátıje kórsetkenin, bıznes júrgizýdi jaqsartý boıynsha 28 orynǵa kóterilgenin aıtty.
«Halyqaralyq saýda» reıtınginde óte nashar deńgeıde, 102 orynda turmyz. Bul bizdiń teńizge shyǵar jolymyzdyń bolmaýymen jáne jer aýmaǵymyzdyń úlkendigimen, al shekaradan ótýdiń avtomattandyrylmaýymen baılanysty. Aǵymdaǵy jyly biz arnaıy baǵdarlama engizdik jáne kelesi jyly atalǵan ındeks boıynsha bizde múldem basqa kórsetkish bolady dep kútemiz», - dedi Úkimet basshysy.
Baqytjan Saǵyntaev elimizde bızneske óz óndiristerin jańǵyrtý úshin tsıfrlandyrýdy qoldanýǵa barlyq múmkinshilik berilip otyrǵanyn aıtty. Sonymen qatar «Astana Hub» halyqaralyq it-startaptar tehnoparkiniń bıznes úshin qandaı múmkinshilikter usynatyndyǵyna toqtaldy.
«Bul jerde de zańnamamyzdy ózgerttik. Astanada tek Qazaqstandyq rezıdentter ǵana emes, sondaı-aq atalǵan aýmaqqa qatysyp, onyń múmkinshilikterin paıdalanǵysy keletin sheteldik kompanııalardyń da jumys isteýine múmkinshilik bar. Jumys vızasyn jeńildetip, salyqtyq jeńildikter berdik, granttyq qoldaý, baspana usyndyq. Olar osy jerde túrli naryqtarǵa suranysqa ıe bolatyn óz ónimderin jasaýy úshin jaǵdaı jasadyq. Baǵdarlama endigi ǵana iske qosyldy. Búginde búkil el atalǵan baǵdarlama elementterin ómirde júzege asyrýǵa jumyldyrylǵan. Menińshe, kelesi tsıfrlyq forýmda jetistikter jaıynda aıtatyn bolamyz», - dedi Baqytjan Saǵyntaev.
Aıta keteıik, forýmnyń tsıfrlyq ekonomıkany damytýdyń jahandyq trendteri talqylanǵan jalpy otyrysyna qatysqan Premer-Mınıstr «Digital Bridge» úlken baılanystar jasalatyn alańǵa aınalatyndyǵyn aıtqan edi.
Digital Bridge - Qazaqstandaǵy bıylǵy jyly ótip otyrǵan basty ınnovatsııalyq oqıǵa.
