Qazaqstan tehnologııalyq bodandyqtan saq bolýy kerek - Nobel syılyǵynyń laýreaty
«Aqparattyq ınfraqurylymdy damytqan durys. Ol jaqsy. Sonyń arqasynda adam ómiri yńǵaıly bolady. Úıge kirmeı jatyp, jaryqty qosa alasyń jáne taǵysyn taǵy. Alaıda onyń keri tusy da bar ekenin umytpaý qajet. Mysaly, Huawei, Cisko, IBM sııaqty kompanııalar aqparattyq ınfraqurylymǵa qajetti datchıkterdi jáne taǵy basqa qurylǵylardy satady. Mine, sonyń bárin satyp alǵannan keıin biz eriksiz ol texnologııalardyń qulyna aınalamyz. Kim biledi, erteń bireý ony óz múddesi úshin paıdalanýy ábden múmkin. Sondyqtan aqparattyq ınfraqurylymdy jasaǵanda onyń negizi ózińdiki bolýy qajet. Meıli, temirdi shetelden satyp al, biraq ony basqaratyn mamandar jergilikti aımaqtyń adamdary bolýy shart. Sosyn temirdi alǵan kúnniń ózinde «jýchoktar» bar ma, joq pa, tolyǵymen tekserip shyǵý qajet», - dedi Tımashev jýrnalısterge bergen suxbatynda.
Osy oraıda ǵalym keńestik zamannyń jaǵymsyz bir tájirıbesin eske aldy. Ol kezde amerıkalyq kompıýterlerdi satyp alǵanda ishinde arnaıy bloktar bolǵan. Sol arqyly teńizdiń arǵy jaǵynda otyrǵandar barlyq aqparatty bilip jatty.
«Kezinde Polsha óz jerindegi jylý elektr stansalaryna sheteldiń qural-jabdyqtaryn satyp aldy. Barlyq qondyrǵylar arzanǵa tústi. Alaıda ol qural-jabdyqtar búkil respýblıkaǵa tarap, jylý elektr stansalarynyń negizgi apparatýrasyna aınalǵanda sheteldik kompanııa qajetti bólshekterdiń baǵasyn birden kóterip tastady. «Nege qymbat?» dep suraǵanda, «Alsań al, almasań qoı! dep jaýap bergen eken. Amal joq, soǵan táýeldi bolyp qaldy. Sóıtip, ol kompanııa Polshanyń monopolısi bolyp shyǵa keldi», - dep atap kórsetti Tımashev.
Aıta keteıik, búgin QR Prezıdenti Nursultan Nazarbaev bir top sheteldik ǵalymdarmen kezdesti. Olardyń arasynda Nobel syılyǵynyń laýreattary, tanymal professorlar, kompanııa basshylary men burynǵy prezıdentter bar. Barlyǵy Astana ekonomıkalyq forýmyna qatysýǵa keldi. Prezıdent olardy Aqordada qabyldap, álemdegi saıası-ekonomıkalyq júıeniń qalaısha ózgerip jatqanyn jetkizdi.