Qazaqstan tehnologııalyq damý arqyly memlekettik basqarý júıesiniń tıimdiligin arttyryp jatyr - Sergeı Melkonıan
EREVAN. KAZINFORM – Qazaqstan tehnologııalyq damýǵa ekpin túsire otyryp, ortalyq atqarýshy organdardyń sheshim qabyldaý tıimdiligin jetildirýge kiristi. Mundaı paıymdy Prezıdent Joldaýynda qamtylǵan bastamalarǵa qatysty pikir bildirgen beldi armıan saıasattanýshysy, Armenııanyń qoldanbaly saıası zertteýler ınstıtýtynyń (APRI Armenia) ǵylymı qyzmetkeri Sergeı Melkonıan aıtty, dep habarlaıdy Kazinform agenttiginiń Erevandaǵy menshikti tilshisi.
Sóz basynda sarapshy Joldaýdaǵy birneshe mańyzdy basymdyqtarǵa toqtaldy. Onyń pikirinshe, bul qujatta naqty strategııalyq kózqaras baıandalǵan.
- Qasym-Jomart Toqaev Joldaýda jahandyq ahýalǵa keńinen toqtalǵan. Álemdegi turaqsyzdyq, jyldar boıy qalyptasqan halyqaralyq tártiptiń ózgerip jatqany jáne jańa tehnologııalyq dáýirdiń qalyptasýyna tereń taldaý jasalyp, baǵa berilgen. Osy rette Prezıdent Qazaqstannyń keıbir salalarda, atap aıtqanda, bank sektoryn tsıfrlandyrý baǵytynda aldyńǵy qatarda turǵanyn atap ótti. Alaıda qol jetkizgen jetistikterge toqmeıilsýge bolmaıdy. Sebebi qazirgi kórsetkishpen shektele berse, memleket tehnologııalyq damý turǵysynan basqa elderden artta qalýy múmkin, - dedi Sergeı Melkonıan.
Saıasattanýshy nazar aýdarǵan bastamalardyń biri - jasandy ıntellektini barlyq sektorǵa júıeli engizý. Jańa tehnologııalardy aýyl sharýashylyǵy, energetıka jáne basqa da salalardy ilgeriletý úshin qoldanýǵa bolǵanymen, ony tıimdi damytatyn memlekettik basqarý júıesin qalyptastyrý qajet.
- Jetkilikti resýrstar bola tura olardy durys basqara almasań, naqty mejege qol jetkizý qıyn. Sondyqtan memlekettik basqarýdyń tıimdiligi óte mańyzdy. Osy turǵydan alǵanda, bul máseleniń Joldaýda negizgi baǵyttardyń biri retinde aıqyndalýyn joǵary baǵalaımyn. Jalpy, alǵash qaraǵanda, qujatta qamtylǵan mindetter qysqa merzimdi jospar sııaqty kórinýi múmkin. Alaıda menińshe, bul – uzaq merzimdi strategııa. Sebebi mundaı aýqymdy jobalar bir nemese eki jylda júzege aspaıdy. Árıne, jekelegen nysandardy qysqa ýaqytta salýǵa bolady. Biraq kólik dálizderin damytý, memlekettik basqarý júıesin jańǵyrtý jáne jańa tehnologııalardy engizý uzaq ýaqytty talap etedi, - dep pikir bildirdi sarapshy.
Sergeı Melkonıanyń oıynsha, jańa tehnologııalar, ekonomıka, energetıka jáne memlekettik basqarý salasyndaǵy turaqtylyq Qazaqstannyń odan ári damýyna negiz bolmaq.
- Joldaýda Prezıdent syrtqy saıasat pen qorǵanys salasyna jeke toqtalǵan joq. Menińshe, Memleket basshysy Qazaqstannyń jarqyn bolashaǵyn eldiń ishki turaqtylyǵy jáne ornyqty damýymen baılanystyrady. ıAǵnı, ekonomıka, energetıka, jańa tehnologııalar jáne memlekettik basqarý salalaryndaǵy turaqtylyq eldiń odan ári damýyna negiz bolady. Al syrtqy saıasat pen qorǵanys máseleleriniń jeke basymdyq retinde atalmaýy qazirgi kezeńde memlekettiń damý kún tártibinde bul baǵyttardyń aldyńǵy qatarda turmaǵanyn bildirýi múmkin, - deıdi saıasattanýshy.
Sergeı Melkonıannyń sózinshe, Qazaqstan tehnologııalyq jańǵyrýdy basty basymdyqtardyń biri retinde aıqyndaı otyryp, ortalyq atqarýshy organdardyń sheshim qabyldaý sapasy men tıimdiligin arttyrýǵa kiristi.
- Qazaqstan tehnologııalyq damýǵa ekpin túsire otyryp, ortalyq atqarýshy organdardyń tıimdi sheshim qabyldaý júıesin jetildirýge kiristi. Sáıkesinshe, onyń negizin qazirden qalyptastyrý oryndy. Bolashaq týraly sóz qozǵaǵanda, tek ýnıversıtetterdegi jaǵdaıǵa emes, sondaı-aq mektepterdegi ahýalǵa da nazar aýdarýymyz kerek. Óıtkeni, bolashaqta eldiń damýyn jalǵastyratyn, qaı baǵytty tańdaý kerektigin túsinetin urpaq qalyptasýy qajet. Ol býyn buǵan daıyn bolýy tıis. Jalpy, kóptegen elderde kóleńkeli ekonomıka, sheshim qabyldaý úderisteriniń ashyq bolmaýy sııaqty máseleler bar. Prezıdent Qazaqstanda da mundaı olqylyqtar bar ekenin málimdedi. Eger olardy qoldanystaǵy quraldarmen sheshý múmkin bolmasa, onda tehnologııalardy engizý qajet. Bul óz kezeginde ashyqtyqty arttyryp, shaǵyn jáne orta bıznestiń ekonomıkalyq protsesterge qatysýyn keńeıtýge múmkindik beredi. ıAǵnı, tehnologııalar bilim berý salasynan bastap memlekettik basqarýǵa deıin qoǵamnyń barlyq salasyna enýi kerek. Meniń paıymymsha, bul mindetti talap retinde qarastyrylyp otyr. Sebebi el basshylyǵy muny dál qazir júzege asyrmasa, bastamalar tek sóz júzinde qalyp qoıýy múmkin ekenin túsinedi. Sondyqtan Qazaqstan tehnologııalyq damý arqyly memlekettik basqarý júıesiniń tıimdiligin arttyryp jatyr, - dep pikir bildirdi Sergeı Melkonıan.
Qazaqstan azyq-túlik, energetıka, tsıfrlyq tehnologııalar, kólik baılanysy jáne basqa da salalarda ózin tolyq qamtamasyz ete alatyn elge aınalýdy maqsat etip otyr. Aldaǵy 5 nemese 10 jylda álemniń qaı baǵytta damıtynyn naqty boljaý qıyn. Sarapshy pikirinshe, mundaı jaǵdaıda ózin-ózi qamtamasyz ete alý qabileti eldiń ilgerileýi men qaýipsizdigine basty kepil bolady.
Eske salaıyq, taıaýda Prezıdent Qasym-Jomart Toqaevtyń bastamalaryna qatysty pikir bildirgen beldi ózbekstandyq sarapshy Ravshan Nazarov Joldaý Qazaqstannyń jańa damý baǵdaryn aıqyndaıtynyn aıtqan edi.
Qosa ketsek, 28 qazanda Memleket basshysy Qasym-Jomart Toqaev Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Joldaýyn jarııalaǵan edi.