Qazaqstan teatry «Jibek» mıýzıklin ózbekstandyq kórermenderge usyndy
AQTÓBE. KAZINFORM — Qazaqstandyq «Jastar» teatrynyń qoıylymy kórermender men IV Halyqaralyq TÚRKSOI teatr festıvaliniń qazylar alqasy tarapynan joǵary baǵalandy. Bul týraly Kazinform agenttiginiń menshikti tilshisi habarlady.
Ózbekstannyń Ándijan qalasynda ótken IV Halyqaralyq TÚRKSOI teatr festıvali aıasynda elordalyq «Jastar» teatrynyń «Jibek» mıýzıkli kórermenge usynyldy. Qazaqstannyń halyq ártisi Nurqanat Jaqypbaı qoıǵan spektakl «Qyz Jibek» tarıhı eposynyń zamanaýı sahnalyq nusqasy sanalady.
Shyǵarmanyń lıbrettosyn Ǵabıt Músirepov jazǵan, al mýzykasyn Evgenıı Brýsılovskıı shyǵarǵan. Basty rólderdi Nazerke Serikbolova (Jibek) pen Meıirǵat Amangeldın (Tólegen) somdady. Qoıylymǵa teatrdyń jas ártisteri de qatysty.
Spektakl sahnalyq qımyldardyń kórkemdigimen, kórinisterdiń dınamıkalyq aýysýymen jáne ózindik mýzykalyq súıemeldeýimen erekshelendi. Qoıylym aıaqtalǵan soń kórermender men halyqaralyq qazylar alqasynyń músheleri ártisterge qoshemet kórsetti.
Festıvaldiń qazylar alqasynyń quramyna engen qazaqstandyq teatr synshysy Beıbit Baqytgereev te qoıylymǵa joǵary baǵa berdi. Onyń aıtýynsha, «Jibek» mıýzıkli qazaqtyń tól mýzykasy negizinde jazylǵan teatr týyndylarynyń azdyǵyn tolyqtyrýǵa úles qosady. Sondaı-aq qoıylym rejısserlik sheberligimen jáne sahnalyq qımyldardyń joǵary deńgeıimen erekshelenedi.
Ándijandaǵy festıval túrki áleminiń ár elinen kelgen teatr ujymdaryn biriktirip, kórermenderdi ulttyq mádenı muranyń zamanaýı sahnalyq nusqalarymen tanystyryp keledi.
Buǵan deıin Ándijanda TÚRKSOI halyqaralyq teatr festıvali ashylǵanyn habarlaǵan bolatynbyz.
