Qazaqstan Tájikstannyń BUU Qaýipsizdik Keńesine kandıdatýrasyn qoldaıdy — Prezıdent
ASTANA. KAZINFORM — Qazaqstan BUU Qaýipsizdik Keńesiniń 2028-2029 jyldardaǵy turaqty emes múshesine úmitker retinde Tájikstannyń kandıdatýrasyn qoldaıdy. Bul týraly Prezıdent Qasym-Jomart Toqaev Aqordada BAQ ókilderine arnalǵan brıfıngte aıtty.
Prezıdent eki el arasyndaǵy mádenı-gýmanıtarlyq baılanystardy nyǵaıtý sharalaryna arnaıy toqtaldy.
— Turaqty túrde ótkizilip turatyn Mádenıet kúnderi, shyǵarmashyl zııaly qaýym ókilderi arasyndaǵy belsendi dıalog, kórnekti tulǵalarǵa eskertkish ashý — munyń bári azamattarymyzdyń qyzyǵýshylyǵyn týdyratyn dúnıeler. Sondaı-aq biz bilim salasyndaǵy yntymaqtastyqty tereńdetýge múddelimiz. Qazaqstan aımaq elderi ishinde Tájikstan stýdentterine eń kóp bilim grantyn beredi. Jyl saıyn 100 oryn bólinedi. Tájik áskerılerin Qazaqstannyń oqý oryndarynda oqytýdy jalǵastyrýǵa daıynbyz. Bul jumysty júıeli ári uzaqmerzimdi negizde júrgizý úshin áskerı kadrlardy daıarlaý salasyndaǵy úkimetaralyq kelisimge qol qoıyldy, — dedi Memleket basshysy.
Qasym-Jomart Toqaev sózin qorytyndylaı kele, eki eldiń óńirlik jáne jahandyq kún tártibindegi ózekti máseleler boıynsha ustanymy bir ekenin aıtty. Qazaqstan men Tájikstan kópjaqty alańdarda ortaq múddeni birlese ilgeriletýge ázir.
— Kelissóz barysynda Ortalyq Azııadaǵy turaqtylyq pen qaýipsizdikti qamtamasyz etý máselesine erekshe den qoıdyq. Óńirdiń ornyqty damýy — baýyrlas halyqtardyń túpkilikti múddesine saı keletin ortaq maqsat. Qazaqstan BUU Qaýipsizdik Keńesiniń 2028-2029 jyldardaǵy turaqty emes múshesine úmitker retinde Tájikstannyń usynylýyn qýana qabyl aldy. Biz Tájikstannyń kandıdatýrasyn qoldaımyz, — dedi Qasym-Jomart Toqaev.
Aıta keteıik, Aqordada Qazaqstan men Tájikstannyń resmı delegatsııalary úkimetaralyq jáne vedomstvoaralyq deńgeıde 14 qujatqa qol qoıdy.
5-7 qarasha kúnderi Memleket basshysynyń shaqyrýymen elimizge Tájikstan Prezıdenti Emomalı Rahmonnyń resmı sapary ótip jatyr.
Sondaı-aq Qazaqstan Tájikstannyń eń iri saýda seriktesteriniń úshtigine endi.
