Qazaqstan Tájikstannan elektr energııasyn ımporttamaq

ASTANA. KAZINFORM – Elimizge resmı saparmen kelgen Tájikstan Respýblıkasynyń Syrtqy ister mınıstri Sırodjıddın Mýhrıddın eki el arasynda qandaı birlesken jobalar júzege asyrylatynyn aıtty.

— Byltyr ótken joǵary deńgeıdegi kelissózderdiń búgingi kúni naqty nátıjeleri bar. Birinshi, Qazaqstan terrıtorııasynda kúnbaǵys dánin óńdep, kúnbaǵys maıyn shyǵaratyn kásiporyn salý máselesi qarastyrylyp jatyr. Bul ónim keıin Tájikstanǵa eksporttalatyn bolady. Ekinshi, Qazaqstannyń Freedom Bank-iniń Tájikstanda enshiles uıymynyń ashylýy. Úshinshi, Astana, Pavlodar, Shymkent, Kókshetaý, Qostanaı qalalarynda tájik ónimderiniń iri kórmelerin ótkizý. Tórtinshi, Tájikstan terrıtorııasynda jemis-kókónis ónimderin eksportqa ázirleıtin birlesken iri logıstıkalyq ortalyqtyń salynýy. Besinshi, tsıfrlyq salada áriptestik ornatyldy. Atap aıtqanda Qazaqstan usynǵan tsıfrlyq júıeni Tájikstannyń memlekettik organdarynyń veb-resýrstaryna engizý júrgizilip jatyr, - dedi ol. 

Odan bólek Sırodjıddın Mýhrıddın premer-mınıstrdiń orynbasary – Syrtqy ister mınıstri Murat Nurtileýmen kezdesýinde ekonomıkalyq áriptestik jónindegi úkimetaralyq komıssııa jumysyn talqylaǵanyn aıtty. 

— Investıtsııalyq áriptestik máselesine asa mán berildi. Sonyń ishinde Tájikstanda ártúrli salada qyzmet etip jatqan 100-ge jýyq qazaqstandyq kompanııaǵa qolǵabys jasaý máselesi talqylandy. Eki eldiń energetıkalyq áriptestiginiń bolashaǵy zor ekenin atap óttik. Jýyq arada eki el úkimetteriniń arasynda elektr energııasy jónindegi kelisimge qol qoıylatyny jaıly kelistik. Bul qujat «Rogýn» GES-i óndiretin elektr energııasyn Qazaqstanǵa jetkizý máselesin retteıdi, - dedi ol.

Buǵan deıin Qazaqstan men Tájikstan arasynda byltyr saýda-sattyq kólemi qansha paıyz artqanyn jazǵan edik.