Qazaqstan Tájikstanmen tsıfrlandyrý salasyndaǵy tájirıbesin bólisip jatyr
ASTANA. KAZINFORM — Astanada Tájikstannyń memlekettik qyzmetshilerine arnalǵan «Memlekettik basqarýdy tsıfrlyq transformatsııalaýdyń negizderi» atty oqý baǵdarlamasy bastaldy.
20–29 shilde aralyǵynda ótetin trenıngti KazAID Qazaqstandyq halyqaralyq damý agenttigi Tájikstan Respýblıkasy Prezıdentiniń Atqarýshy apparatyna qarasty Tsıfrlyq negizder jobalaryn iske asyrý ortalyǵymen birlesip, «Ulttyq aqparattyq tehnologııalar» AQ-nyń qoldaýymen uıymdastyrdy.
Oqytýǵa Tájikstannyń 15 memlekettik qyzmetshisi qatysyp jatyr. Olar memlekettik basqarýdy tsıfrlandyrý, elektrondyq úkimetti damytý jáne memlekettik aqparattyq júıelerdi engizýdegi Qazaqstan tájirıbesimen tanysady.
Trenıngtiń ashylýynda sóz sóılegen KazAID Qazaqstandyq halyqaralyq damý agenttigi KeAQ Basqarma tóraǵasynyń mindetin atqarýshy, seriktestik jáne óńirlik jobalar departamentiniń dırektory Jandos Asanov KazAID 2020 jyly Qazaqstan Úkimetiniń sheshimimen resmı damý kómegi salasyndaǵy ulttyq operator retinde qurylǵanyn aıtty.
— Agenttiktiń negizgi mindeti — seriktes memleketterdiń turaqty damýyna jáne ınklıýzıvti ekonomıkalyq ósimine tehnıkalyq qoldaý kórsetý. Osy maqsatta tsıfrlandyrý, densaýlyq saqtaý, dıplomatııa, statıstıka jáne basqa da baǵyttar boıynsha oqytý baǵdarlamalaryn uıymdastyryp kelemiz, — dedi ol.
Qazaqstan men Tájikstannyń tsıfrlandyrý salasyndaǵy yntymaqtastyǵy naqty jobalar arqyly damyp keledi.
— 2023 jyly Dýshanbe qalasynda KazAID brendimen Tájikstanǵa tehnıkalyq grant retinde eGov elektrondyq úkimetiniń baǵdarlamalyq qamtamasyz etý júıesi tabystaldy. Joba KazAID, «Ulttyq aqparattyq tehnologııalar» AQ jáne Qazaqstannyń Tájikstandaǵy elshiliginiń qoldaýymen júzege asyryldy. Al 2024 jyly Astana Hub-tyń Tech Orda baǵdarlamasy aıasynda Tájikstannyń IT mamandaryna 100 bilim berý vaýcheri berildi, — dedi Jandos Asanov.
Onyń aıtýynsha, 2024 jyldan beri KazAID memlekettik basqarýdy tsıfrlandyrý tájirıbesin bólisýge arnalǵan «Dostyq: Tsıfrlandyrý» baǵdarlamasyn turaqty ótkizip keledi. Alǵashqy semınar Sıngapýr Syrtqy ister mınıstrliginiń tehnıkalyq yntymaqtastyq dırektoratymen birlesip uıymdastyrylsa, 2025 jyldan bastap joba Koreıa halyqaralyq yntymaqtastyq agenttigimen (KOICA) birlesip júzege asyrylyp keledi.
Ótken jyly baǵdarlama Astanada ótip, oǵan Ortalyq Azııa elderiniń ókilderi, sonyń ishinde Tájikstannan kelgen mamandar qatysty. Bıylǵy oqý baǵdarlamasy Koreıa Respýblıkasynda jalǵasady.
Jandos Asanov Qazaqstanda tsıfrlandyrý memlekettik basqarýdyń ajyramas bóligine aınalǵanyn aıtty.
— Elektrondyq úkimet qyzmetteri azamattardyń memlekettik qyzmetterdi alýyn jeńildetip, olardyń qoljetimdiligin arttyrdy. Al memlekettik júıelerdi tsıfrlyq platformalarǵa kóshirý basqarý úderisteriniń tıimdiligi men ashyqtyǵyn kúsheıtip otyr. Búgingi trenıngtiń maqsaty — Qazaqstannyń osy baǵyttaǵy tájirıbesin bólisý. Qatysýshylar alǵan bilim óz elindegi tsıfrlyq transformatsııany damytýǵa yqpal etedi dep senemiz, — dedi ol.
Eske salaıyq, maýsym aıynda Prezıdent 2029 jylǵa deıingi «Digital Qazaqstan» jalpyulttyq strategııasyn bekitken bolatyn. Qujatta memlekettik basqarýdy tsıfrlyq formatqa kóshirý negizgi basymdyqtardyń biri retinde aıqyndalǵan.
