Qazaqstan Tájikstanǵa 5 myń tonna mazýt men azyq-túlik berdi

ASTANA. KAZINFORM — Elimizdiń Tájikstandaǵy Elshiligi tájik tarapyna gýmanıtarlyq kómekti tapsyrý resmı rásimi ótkenin habarlady.

Qazaqstan Respýblıkasynyń Tájikstan Respýblıkasyndaǵy Tótenshe jáne Ókiletti Elshisi Ýálıhan Tórehanov Tájikstan úkimeti janyndaǵy Memlekettik materıaldyq rezervter agenttiginiń dırektory Nýrmahmad Ahmadzodaǵa 5 myń tonna mazýt sertıfıkatyn tabys etti.

Qazaqstan Elshisi eki el arasyndaǵy strategııalyq qarym-qatynastar sheńberinde Qazaqstan basshylyǵy Tájikstan Respýblıkasyna 871,9 mln teńge (shamamen $1,67 mln) kóleminde gýmanıtarlyq kómek kórsetý týraly sheshim qabyldaǵanyn atap ótti.

Sonymen qatar, 144,5 mln teńgege ($276 myń) azyq-túlik ónimderi (67 tonna ósimdik maıy, 50 myń dana sút konservileri jáne 325,6 tonna qaraqumyq jarmasy) tabys etildi.

Gýmanıtarlyq kómek «KazAID» Qazaqstandyq halyqaralyq damý agenttiginiń yqpaldasýymen kórsetildi jáne energetıkalyq qaýipsizdikti qamtamasyz etýge qosqan úles, sondaı-aq qazaq-tájik yntymaqtastyǵyna tán tatý kórshilik pen ózara tıimdiliktiń kórinisi bolyp tabylady.

Sońǵy 5 jylda Qazaqstan tarapynyń Tájikstanǵa jetkizgen gýmanıtarlyq kómeginiń kólemi shamamen 20 mln dollardy qurady.

Aıta keteıik, Tájikstanǵa 10 aıda bir mıllıon tonnadan astam astyq eksporttaldy.