Qazaqstan, Tájikstan jáne Ózbekstan jazǵy sý rejımin kelisti
ASTANA. KAZINFORM - QR Sý resýrstary jáne ırrıgatsııa mınıstri Nurjan Nurjigitov, Tájikstan Respýblıkasynyń Energetıka jáne sý resýrstary mınıstri Djýma Daler jáne Ózbekstan Respýblıkasynyń Sý sharýashylyǵy mınıstri Shavkat Hamraev 2026 jyldyń maýsym-tamyz aılaryna arnalǵan «Bahrı-Tochık» sý qoımasynyń jumys rejımin kelisti.
QR Sý resýrstary jáne ırrıgatsııa mınıstrligi baspasóz qyzmetiniń habarlaýynsha, taraptar úshjaqty hattamaǵa qol qoıdy. Bekitilgen jumys rejımine sáıkes, jaz mezgilinde Túrkistan oblysynyń Maqtaaral men Jetisaı aýdandary dıqandaryn sýmen qamtamasyz etý úshin «Bahrı-Tochık» sý qoımasynan sý jiberiledi.
-Ońtústik óńirlerdi sýarmaly sýmen qamtamasyz etý máselesi erekshe baqylaýda. Qol jetkizilgen kelisimder – Ortalyq Azııa elderi arasyndaǵy syndarly ózara is-qımyl men ózara qoldaýdyń nátıjesi. Qabyldanǵan sharalar vegetatsııa kezeńiniń turaqty ótýin qamtamasyz etip, otandyq dıqandarǵa qoldaý kórsetýge múmkindik beredi, - dedi Sý resýrstary jáne ırrıgatsııa mınıstri Nurjan Nurjigitov.
Kezdesý qorytyndysy boıynsha Qazaqstan, Tájikstan jáne Ózbekstannyń sý sharýashylyǵy vedomstvolarynyń basshylary óńirdegi sý resýrstaryn utymdy jáne ózara tıimdi paıdalaný baǵytyndaǵy yntymaqtastyqty odan ári nyǵaıtýǵa daıyn ekenin rastady.
Osyǵan deıin Nurjan Nurjigitov óńirde sý qaýipsizdigi úshin naqty birlesken tetikter qajet ekenin aıtqan edi.
