Qazaqstan tájirıbesin ózge eldermen bólisýge ázir - Baqytjan Saǵyntaev
«Qazaqstan Eýrazııanyń barlyq elderimen belsendi yntymaqtastyq aıasynda ekonomıkalyq ıntegratsııaǵa qol jetizý saıasatyn ustanady. Eýrazııalyq ekonomıkalyq odaqqa qatysýymyz ulttyq ekonomıkamyzdy ártaraptandyrýdyń negizgi quraly sanalady. Qazaqstan «Bir beldeý, bir jol» strategııasyn damytýdy qoldaıdy jáne atalǵan joba aıasynda halyqaralyq yntymaqtastyqqa daıynbyz. Atalǵan maqsatta halyqaralyq naryqtarǵa taýarlardy shyǵarý úshin qysqa, ekonomıkalyq turǵyda tıimdi logıstıkalyq jol jasadyq. Qazaqstan 2015 jyldan bastap Dúnıejúzilik saýda uıymynyń resmı múshesi bolyp tabylady. Bul - bizdiń elimizdiń Ortalyq Azııa óńirindegi kóshbasshyǵa, jahandyq ekonomıkalyq protsesterdiń iri oıynshylarynyń birine transformatsııalanýyna múmkinshilik», - dedi Baqytjan Saǵyntaev.
Premer-Mınıstrdiń paıymynsha, búginde Ortalyq Azııa men Kavkaz elderi áleýmettik-ekonomıkalyq damý, óńirdegi turaqtylyqty qamtamasyz etý, ınvestıtsııa tartý jáne qyzmetterdiń ınnovatsııalyq túrlerin yntalandyrý maqsaty tóńiregine toptasqan.
«Biz teńdestirilgen syrtqy saıasat ustanamyz, elimizdi jáne ekonomıkamyzdy úshinshi jańǵyrtýdy iske qostyq. Prezıdent Nursultan Nazarbaev negizgi salalardy jańǵyrtýdyń, kásipkerlik pen ónimdi jumysty, adam kapıtalyn damytýdyń jańa basymdyqtary men mindetterin aıqyndap berdi. Munyń barlyǵy da Qazaqstannyń jahandyq básekege qabilettiligin nyǵaıtyp qana qoımaı óńirlik ıntegratsııaǵa da kómegin tıgizetin jańa saıasattyń basymdyqtary sanalady. Qazaqstan Úkimeti Halyqaralyq valıýta qorymen yntymaqtastyqtaǵy bilimi men aldyńǵy qatarly tájirıbesin Kavkaz, Ortalyq Azııa elderine taratýǵa kómek kórsetýge daıyn», - dedi Úkimet basshysy.
Aıta keteıik, Qazaqstan 1992 jyldyń 15 shildesinde Halyqaralyq valıýta qoryna múshe boldy. Búginde elimizdiń Ulttyq banki bul qormen kóptegen másele boıynsha tyǵyz yntymaqtastyqta jumys isteıdi.